របាយការណ៍របស់សមត្ថកិច្ចបានបង្ហាញថា តូបលក់ឥវ៉ាន់របស់អាជីវករជាជនខ្មែរលក់នៅក្នុងផ្សាររុងក្លឿ ក្នុងទឹកដីថៃ ចំនួន៤តូប ត្រូវភ្លើងឆេះកាលពីទៀបភ្លឺថ្ងៃទី២៥ ខែតុលា បណ្តាលឲ្យខាតបង់គិតជាទឹកប្រាក់អស់ជាង១ពាន់លានរៀល។
គេហទំព័រអគ្គស្នងការដ្ឋាននគរបាលជាតិចុះផ្សាយថា ហេតុការណ៍ភ្លើងឆេះនោះកើតឡើងកាលពីម៉ោង៣និង១៥នាទីទៀបភ្លឺនៅថ្ងៃទី២៥ ខែតុលា។ របាយការណ៍របស់អាជ្ញាធរខេត្តស្រះកែវរបស់ថៃបានឲ្យដឹងថា ភ្លើងឆេះធ្វើឲ្យអាវជីករជាជនជាតិកម្ពុជាខាតបង់អស់ប្រមាណ១០លានបាត ដែលស្មើនឹងជាង១ពាន់លានរៀល។
របាយការណ៍សមត្ថកិច្ចថៃបង្ហាញទៀតថា ក្នុងចំណោម៤តូបនោះ គឺ២តូបឆេះអស់ទាំងស្រុង និង២តូបទៀត ខូចខាតអស់មួយចំនួន។ ជាការសន្និដ្ឋានបឋមគឺសមត្ថកិច្ចថៃអះអាងថា ការឆេះនេះដោយសារបញ្ហាឆ្លងចរន្តអគ្គិសនី៕
