ថ្នាក់ដឹកនាំ និង តំណាងរាស្ត្រគណបក្សប្រឆាំង បានរំឭកពីខួប១ឆ្នាំនៃហេតុការណ៍វាយដំលើតំណាងរាស្ត្រពីររូបនៅក្បែររបវិមានរដ្ឋសភា កាលពីថ្ងៃទី២៦ខែតុលាឆ្នាំ២០១៥។
ប្រធានគណបក្សសង្គ្រោះជាតិលោក សម រង្ស៊ី សរសេរនៅលើហ្វេសប៊ុករបស់លោកថា ថ្ងៃនេះ ជាខួប១ឆ្នាំនៃការវាយដំលើតំណាងរាស្ត្រ២រូបឲ្យរងរបួសធ្ងន់។ លោក សម រង្ស៊ី ក៏មានភ្ជាប់វីឌីអូ បង្ហាញពីសកម្មភាពអ្នកតវ៉ាមួយក្រុមវាយលើតំណាងរាស្ត្រផងដែរ។
ចំណែកតំណាងរាស្ត្រគណបក្សសង្គ្រោះជាតិលោក ញ៉យ ចំរើន ដែលជាអ្នករងគ្រោះពីការវាយដំ ក៏សរសេរសារ ប្រហាក់ប្រហែលលោក សម រង្ស៊ីដែរ គឺរំឭកពីការវាយដំ ៖ «ថ្ងៃនេះ ថ្ងៃទី២៦ តុលា ២០១៦ ជាថ្ងៃគម្រប់ខួបមួយឆ្នាំនៃព្រឹត្តិការណ៍វាយប្រហារមកលេីរូបខ្ញុំ និង ឯឧ. គង់ សភា កាលពីថ្ងៃទី២៦ ខែតុលា ឆ្នាំ២០១៥កន្លងទៅ នៅក្បែររបងវិមានរដ្ឋសភា។»
កាលពីថ្ងៃទី២៦ខែតុលាឆ្នាំ ២០១៥ ក្រុមកុប្បករមួយដែលគាំទ្រគណបក្សប្រជាជនកម្ពុជា បានវាយ ជាន់ធាក់ តំណាងរាស្ត្រគណបក្សសង្គ្រោះជាតិ២រូបផ្ទប់និងដី បណ្តាលឲ្យរងរបួសធ្ងន់។
កាលពីថ្ងៃទី២៧ខែឧសភាឆ្នាំ២០១៦ សាលាដំបូងរាជធានីភ្នំពេញបានផ្តន្ទាទោសបុរស៣នាក់ ដែលជាប់ពាក់ព័ន្ធនិងការវាយលើតំណាងរាស្ត្រគណបក្សសង្គ្រោះជាតិ ឲ្យជាប់ពន្ធនាការ ម្នាក់ៗ៤ឆ្នាំ។