របាយការណ៍បង្ហាញថា កំណើននាំចេញក្នុងវិស័យកាត់ដេរធ្លាក់ចុះ

របាយការណ៍សមាគមរោងចក្រកាន់ដេរនៅកម្ពុជា បង្ហាញថា កំណើននៃការនាំចេញផលិតផល ក្នុងវិស័យកាត់ដេរសំលៀកបំពាក់ មានការថយចុះ ក្នុងរយៈពេល៦ខែដើមឆ្នាំ២០១៧នេះ ដោយសារតែផលិតកម្មក្នុងវិស័យនេះបានថយចុះ។​

របាយការណ៍បង្ហាញថា រយៈពេល៦ខែឆ្នាំ២០១៧ ចាប់ពីខែមករា ដល់ខែមិថុនា វិស័យកាត់ដេរសំលៀកបំពាក់ និងស្បែកជើង ទទួលបានកំណើននាំចេញទន់ខ្សោយ គឺនៅចន្លោះ៥ភាគរយ បើប្រៀបធៀបនឹងឆ្នាំ២០១៦ មានកំណើនដល់៧ភាគរយ។

ថ្លែងក្រោយកិច្ចប្រជុំមួយកាលពីថ្ងៃម្សិលមិញ អគ្គលេខាធិការនៃសមាគមរោងចក្រកាត់ដេរនៅកម្ពុជា លោក កេន លូ បានឲ្យអ្នកសារព័ត៌មានដឹងថា ការកើតឡើងឬ ថយចុះនៃអត្រាកំណើននាំចេញនេះ គឺជារឿងធម្មតា ដែលតែងកើតមាននៅលើទីផ្សារអន្ដរជាតិ។

ទោះយ៉ាងណាលោក កេន លូ បានសំដែងក្ដីបារម្ភថា អត្រាប្រាក់ឈ្នួលរបស់កម្មករកម្ពុជា ដែលនឹងដំឡើងដល់ ១៧០ដុល្លារ នៅឆ្នាំ២០១៨នោះ នឹងធ្វើឲ្យកម្ពុជា ពិបាកក្នុងការប្រកួតប្រជែងជាមួយប្រទេសដទៃ ដោយសារថ្លៃដើមនៃការផលិតកើតឡើង​។ លោកស្នើឲ្យរដ្ឋាភិបាល ធ្វើយ៉ាងណាជួយ ធ្វើឲ្យថ្លៃដើមនៃការផលិតថយចុះ ដោយថានៅពេលខាងមុខក្រុមអ្នកផលិតត្រូវបង្កើនផលិតផលរបស់ពួកគេដើម្បីប្រកួតប្រជែង។​

ដោយឡែក របាយការណ៍ របស់មូលនិធិរូបិយវត្ថុអន្ដរជាតិ ឬហៅកាត់ថា IMF ដែលចេញផ្សាយកាលពីសប្ដាហ៍មុន បង្ហាញដែរថា វិស័យកាត់ដេរសំលៀកបំពាក់នៅកម្ពុជា ទទួលបានកំណើនទន់ខ្សោយបន្ដិច ក្នុងរយៈពេល៦ខែដើមឆ្នាំ២០១៧  ធ្លាក់មកត្រឹម ៧ភាគរយ ពោលគឺធ្លាក់ចុះ ០,២ភាគរយ ពីចំនួន៧,២ភាគរយនៅឆ្នាំ២០១៦៕