ក្រសួងធនធានទឹកនិងឧតុនិយមបានប្រកាសថាខេត្តចំនួន៤ក្នុងប្រទេសកម្ពុជា នឹងទទួលរងអាកាសធាតុចុះត្រជាក់ខ្លាំងចាប់ពីថ្ងៃទី២៨ រហូតដល់ថ្ងៃទី៣០ ខែធ្នូ ឆ្នាំ២០១៦។
យោងតាមសេចក្ដីប្រកាសព័ត៌មានរបស់ក្រសួងចេញផ្សាយនៅថ្ងៃចន្ទ ទី២៦ ធ្នូនេះបង្ហាញថា ខេត្តចំនួន៤ដែលនឹងចុះត្រជាក់ខ្លាំង រួមមានខេត្តមណ្ឌលគិរី រតនគិរី ព្រះវិហារ និងឧត្តរមានជ័យ ដោយមានសីតុណ្ហភាពចន្លោះពី១៦ទៅ១៨អង្សារសេ។
ក្រសួងបញ្ជាក់ថា មូលហេតុនាំឲ្យខេត្តចំនួន៤នេះចុះត្រជាក់ខ្លាំង ដោយសារកម្ពុជានឹងទទួលរងឥទ្ធិពលខ្យល់មូសុងឦសាន ខណៈខ្យល់ព្យុះ «ណុកថេន» អាចបង្កើតបានជាវិសម្ពាធទាបមួយមកលើប្រទេសកម្ពុជា បន្ទាប់ពីអស់ឥទ្ធិពលលើសមុទ្រចិនខាងត្បូងក្បែរប្រទេសវៀតណាម។
សេចក្ដីប្រកាសព័ត៌មានឲ្យដឹងទៀតថា ខេត្តសៀមរាប បាត់ដំបង និងខេត្តប៉ៃលិន នឹងមានសីតុណ្ហភាពអប្បបរមាចន្លោះពី១៨ទៅ២០អង្សារសេ។ ចំណែកតំបន់តាមបណ្ដារាជធានីនិងខេត្តដទៃទៀតនឹងមានសីតុណ្ហភាពពី១៩ទៅ២១អង្សារសេ។ រីឯតំបន់មាត់សមុទ្រ សីតុណ្ហភាពស្ថិតនៅចន្លោះពី២២ ទៅ២៤អង្សារសេ៕