ករណីប៉ូលីសម្នាក់ដួលមុខរថយន្តនៅខេត្តបន្ទាយមានជ័យកាលពីចុងសប្តាហ៍មុន បានក្លាយជាប្រធានបទមួយ ដែលមានការជជែកគ្នានៅពេលប្រជុំពេញអង្គរដ្ឋសភានៅព្រឹកថ្ងៃចន្ទនេះ រវាងមេដឹកនាំបក្សកាន់អំណាចនិងតំណាងរាស្ត្របក្សប្រឆំាង។
លោកនាយករដ្ឋមន្រ្តី ហ៊ុន សែន បានចំអកឲ្យតំណាងរាស្ត្រគណបក្សម្នាក់ដែលបានជំរុញឲ្យក្រសួងមហាផ្ទៃស៊ើបអង្កេតលើករណីមន្រ្តីនគរបាលផ្តួលខ្លួននៅពីមុខរថយន្តរបស់មន្រ្តីគណបក្សសង្រ្គោះជាតិនៅក្រុងប៉ោយប៉ោយប៉ែត ខណៈលោក អេង ឆៃអ៊ាង បានលើកយកបញ្ហានេះមកជជែកក្នុងពេលប្រជុំសភា។
បើតាមវីដេអូដែលផ្សាយតាមហ្វេសប៊ុកកាលពីចុងសប្តាហ៍មុនបានបង្ហាញថា មន្រ្តីនគរបាលច្រកព្រំដែននៅក្រុងប៉ោយប៉ែត ឈ្មោះ ពិសិដ្ឋ បានផ្តួលខ្លួនឯងនៅមុខរថយន្តមួយគ្រឿងរបស់មន្រ្តីគណបក្សសង្គ្រោះជាតិប្រចាំខេត្តបន្ទាយមានជ័យ លោក ម៉ង់ ពុទ្ធី។ ក្រោយកើតហេតុការណ៍ សមត្ថកិច្ចបានចាប់ឃុំខ្លួនមន្ត្រីបក្សប្រឆំាងរូបនោះ ដោយចោទប្រកាន់ពីបទប៉ុនប៉ងមនុស្សឃាតដោយចេតនា។
ករណីនេះត្រូវបានតំណាងរាស្ត្រគណបក្សសង្គ្រោះជាតិលោក អេង ឆៃអ៊ាង លើកយកមកធ្វើជាប្រធានបទមួយ នៅក្នុងកិច្ចប្រជុំពេញអង្គរដ្ឋសភា ដោយលោកវិភាគថា ករណីមន្ត្រីនគរបាលច្រកប៉ោយប៉ែតដួលមុខរថយន្តនោះគឺជាការសំដែង៖ «ពេលយើងមើលទិដ្ឋភាពក្តាប់ដៃ ដៃក្តាប់អាយកូម ក្តាប់សោឡាន បើមនុស្សដួលដោយសារដៃប៉ះទង្គិច ដៃក្តាប់អត់បានទេ (លាត) ព្រោះកាលណាមានកម្លាំងមក គឺមនុស្សលាដើម្បីទប់ មិនអាចលាតទេ ប៉ុន្តែក្នុងករណីក្តាប់គឺអាចមានជម្ងឺមួយដែលយើងដឹងហើយ គឺជម្ងឺអត់ទប់ទេ គេហៅថាជម្ងឺ អេពីឡាបស៊ី (ជម្ងឺស្កន់ចូល) ករណីនេះ អ្នកខ្លះចៃដន្យ គឺភ្លាមៗតែម្តង ជួនកាលមានចិត្តដូចថា មានអារម្មណ៍ខឹងភ្លាមទៅ បើគាត់មានជម្ងឺនេះ គាត់មានបញ្ហាហ្នឹងភ្លាម»។
ក្រោយពីលោក អេង ឆៃអ៊ាង ថ្លែងចប់ លោកនាយករដ្ឋមន្ត្រី ហ៊ុន សែន បានឆ្លើយតបបែបឌឺដងទៅកាន់តំណាងរាស្ត្របក្សប្រឆំាងរូបនោះថា បើពូកែធ្វើកោសល្យវិច្ច័យ គួរតែឈប់ធ្វើតំណាងរាស្ត្រ ហើយទៅធ្វើពេទ្យកោសល្យវិច្ច័យវិញ៖ «ខ្ញុំគួរតែកោតសសើរឯកឧត្តម អេង ឆៃអ៊ាង ដែលបានក្លាយទៅជាពេទ្យធ្វើកោសល្យវិច្ច័យថា តើដួលទៅ(មន្ត្រីនគរបាលច្រកព្រំដែន ក្រុងប៉ោយប៉ែត)វាត្រូវក្តាប់ឬវាត្រូវអី ដូចថាម្យ៉ាងដែរ បើសិនឯកឧត្តមទៅធ្វើពេទ្យកោសល្យវិច្ច័យវាល្អជាងធ្វើតំណាងរាស្ត្រ»។
សាលាដំបូងខេត្តបន្ទាយមានជ័យបានឃុំខ្លួនអ្នកបើករថយន្តគឺលោក ម៉ង់ ពុទ្ធី អាយុ៣៨ឆ្នាំ ជាអនុប្រធានគណបក្សប្រឆាំងប្រចាំក្រុងប៉ោយប៉ែត ពីបទពីបទប៉ុនប៉ងមនុស្សឃាត បើទោះជាមានសាក្សីជាច្រើននាក់បានបញ្ជាក់ថា លោក ម៉ង់ ពុទ្ធី មិនបានបើករថយន្តប៉ះនគរបាលរូបនោះក៏ដោយ៕