ជនជាតិវៀតណាម ២៥នាក់ដែលចូលមកធ្វើការតាមហាងកាត់សក់ និងម៉ាស្សាមួយចំនួននៅ ភ្នំពេញ ត្រូវបានអាជ្ញាធរអនុវត្តច្បាប់ចុះឃាត់ខ្លួន ពីបទស្នាក់នៅនិងធ្វើការដោយ គ្មានឯកសារត្រឹមត្រូវ។
តាមការចុះផ្សាយរបស់អគ្គស្នងការនគរបាលជាតិបានឲ្យដឹងថានៅថ្ងៃទី២៦ ខែមករាម្សិល មិញ អធិការដ្ឋាននគរបាលខណ្ឌ៧មករា ចុះដកហូតឯកសារមិនប្រក្រតីពីជនជាតិវៀតណាមចំនួន០៥នាក់(ស្រី០១នាក់) និងបញ្ជូនមក ការិយាល័យស៊ើបអង្កេត និងអនុវត្តនីតិវិធីផែនអន្តោប្រវេសន៍រាជធានីភ្នំពេញ។
ដោយឡែកជនជាតិវៀតណាម ២០នាក់ផ្សេងទៀត ត្រូវបានស្នងការដ្ឋាននគរបាលរាជធានី ភ្នំពេញ និងព្រះរាអាជ្ញារងនៃអយ្យការអមសាលាដំបូងលោក សៀង សុខ ចុះអនុវត្ត ដីកា ឃាត់ខ្លួននៅតាមហាងកាត់សក់ និងម៉ាស្សាមួយចំនួននៅក្បែរផ្សារធំថ្មី ខណ្ឌដូនពេញ។
ជនជាតិវៀតណាមទាំង ២០នាក់ដែលមាន ស្រី១៧នាក់នោះត្រូវបាន រកឃើញថា លួចចូលមកស្នាក់នៅ និងប្រមុខរបរខុសច្បាប់ ដោយគ្មានលិខិតឆ្លងដែន។
តាមការចុះផ្សាយរបស់អគ្គស្នងការបានឲ្យដឹងថាបច្ចុប្បន្ន ជនជាតិវៀតណាមទាំងនោះត្រូវ បានបញ្ជូនទៅអគ្គនាយកដ្ឋានអន្តោប្រវេសន៍ ដើម្បីត្រួតពិនិត្យឯកសារ និងបន្តនីតិវិធី៕
