គណបក្សរាជានិយមដែលទទួលបានអសនៈពីការរំលាយបក្សសង្រ្គោះជាតិ បានប្រកាសចាត់វិធានការទប់ស្កាត់ការបែកបាក់ផ្ទៃក្នុង ដើម្បីធានានូវស្ថិរភាពផ្ទៃក្នុងបក្សឲ្យរឹងមាំឈានទៅរកការបោះឆ្នោតខាងមុខ។
គណបក្សហ្វ៊ុនស៊ិនប៉ិចបានប្រកាសពង្រឹងផ្ទៃក្នុងបែបនេះតាមរយៈសេចក្ដីណែនាំមួយចុះថ្ងៃទី ២៥ ខែមករា ដោយលើកឡើងថាមានជនអសកម្មមួយចំនួននៅក្នុងបក្សតែងបង្កភាពអនាធិបតេយ្យ ញុះញង់ បំបែកបំបាក់សាមគ្គីផ្ទៃក្នុង ក្នុងគោលបំណងបំផ្លាញរចនាសម្ព័ន្ធបក្ស។
សេចក្ដីណែនាំដដែលនោះបានឲ្យដឹងដែរថាករណីញុះញង់ បំបែកបំបាក់សាមគ្គីផ្ទៃក្នុងនេះធ្លាប់បានកើតឡើងជារឿយៗតាំងពីអតីតកាល ដែលបង្កដោយជនមួយក្រុមតូចគិតតែពីផលប្រយោជន៍ផ្ទាល់ខ្លួន។
សេចក្ដីណែនាំដដែលនោះបន្តថាដើម្បីជៀសវាងការញុះញង់ បំបែកបំបាក់សាមគ្គីភាពផ្ទៃក្នុង ឬការបំផ្លាញរចនាសម្ព័ន្ធបក្ស គណបក្សឲ្យថ្នាក់ដឹកនាំគ្រប់លំដាប់ថ្នាក់ ត្រូវចាត់វិធានការណ៍ស្របតាមលក្ខន្តិកៈ ឬវិធានផ្ទៃក្នុងបក្ស ចំពោះអ្នកដែលរងការចោទថា បំបែកបំបាក់ផ្ទៃក្នុង។
គណបក្សហ៊្វុនស៊ិនប៉ិចប្រកាសទប់ស្កាត់ការបែកបាក់ផ្ទៃក្នុងបែបនេះ ដោយថា ដើម្បីធានានូវស្ថេរភាពផ្ទៃក្នុងបក្សឲ្យរឹងមាំឈានទៅរកការបោះឆ្នោតថ្ងៃ ២៩ ខែ កក្កដាខាងមុខ។
គណបក្សរាជានិយមដែលមិនទទួលបានការគាំទ្រពីពលរដ្ឋក្នុងការបោះឆ្នោតជាតិឆ្នាំ ២០១៣ នេះត្រូវបាន គ.ជ.ប បែងចែកឲ្យ ៤១ អសនៈបន្ទាប់ពីតុលាការកំពូល បានប្រកាសរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ទៅតាមបណ្ដឹងក្រសួងមហាផ្ទៃ៕