សាលាឧទ្ធរណ៍ នៅថ្ងៃចន្ទនេះ កម្កល់សាលក្រមរបស់សាលាដំបូងរាជធានីភ្នំពេញ ដែលកាត់ទោសឲ្យសកម្មជនដីធ្លី៤នាក់ នៅតំបន់បឹងកក់ជាប់ទោសម្នាក់ៗ៦ខែ ទុកជាបានការដដែល ដោយសំអាងថា ការសម្រេចរបស់តុលាការក្រុងភ្នំពេញធ្វើឡើងតាមនីតិវិធីច្បាប់។
កាលពីថ្ងទី១៩ខែកញ្ញាឆ្នាំ២០១៦ សាលាដំបូងរាជធានីភ្នំពេញ បានផ្តន្ទាទោសស្ត្រីបឹងកក់៤នាក់ ដាក់ពន្ធនាគាររយៈពេល៦ខែ ដោយចោទប្រកាន់ពីបទ ជេរប្រមាថ និងប្រឆាំងនឹងអាជ្ញាធរសាលារាជធានីភ្នំពេញ កាលពីចុងឆ្នាំ២០១១ នៅមុខសាលារាជធានីភ្នំពេញ។ ដោយមិនសុខចិត្ត សកម្មជនទាំង៤នាក់ បានដាក់ពាក្យបណ្តឹងមកសាលាឧទ្ធរណ៍ ដើម្បីឲ្យតុលាការជាន់ខ្ពស់នេះ ទម្លាក់ការចោទប្រកាន់ទៅលើពួកគេ។
ប៉ុន្តែនៅថ្ងៃនេះ ប្រធានក្រុមប្រឹក្សាជំនុំជម្រះសាលាឧទ្ធរណ៍ លោក ញូង ធុល បានប្រកាសសាលដីកា ដោយសម្រេចតម្កល់សេចក្តីសម្រេចរបស់តុលាការជាន់ទាប ទុកជាបានការដដែល ដោយសំអាងថា ការសម្រេចរបស់សាលាដំបូងរាជធានីភ្នំពេញធ្វើឡើងតាមនីតិវិធីច្បាប់។
សកម្មជនដីធ្លីទំាង៤នាក់នោះ រូមមានអ្នកស្រី ទេព វន្នី អ្នកស្រី ហេង មុំ អ្នកស្រី គង់ ចន្ថា និងអ្នកស្រី បូវ ឆវី។ ប៉ុន្តែតុលាការមិនបានឃុំខ្លួនស្រ្តី៣នាក់នោះទេ ដោយបើកសិទ្ធិឲ្យប្តឹងជំទាស់ ដោយឡែកអ្នកស្រី ទេព វន្នី តុលាការនៅបន្តឃុំខ្លួនដដែល ហើយអ្នកស្រី ត្រូវបានតុលាការកាត់ទោសមួយករណីថ្មីទៀតដាក់ពន្ធនាគារ២ឆ្នាំកន្លះ ដែលសរុបតុលាការបានកាត់ទោស៣ដងរួចហើយ៕