ចិន និង សិង្ហបុរីប្រជុំក្រុមប្រឹក្សាកិច្ចសហប្រតិបត្តិការទ្វេរភាគី

ចិន និង សិង្ហបុរី នៅថ្ងៃចន្ទនេះ ចាប់ផ្តើមកិច្ចប្រជុំក្រុមប្រឹក្សាកិច្ចសហប្រតិបត្តិការ​ ទ្វេរភាគី(JCBC) រវាងប្រទេសទាំងពីរនៅទីក្រុងប៉េកាំងនៃប្រទេសចិន។​

កិច្ចប្រជុំនេះ ធ្វើឡើង​រវាងថ្នាក់ដឹកនាំនៃប្រទេសទាំងពីរ។​ កិច្ចប្រជុំ​នេះ គឺចាប់ផ្តើមដោយសហប្រធាន ដោយភាគីសិង្ហបុរីដោយឧបនាយករដ្ឋមន្ត្រី​លោក​ Teo Chee Heanនិង ភាគីចិន​ដោយ ឧបនាយករដ្ឋមន្ត្រីលោក Zhang Gaoli។ នេះ បើតាមសារព័ត៌មាន​Channel News Asia។​

កិច្ចពិភាក្សាកម្រិតខ្ពស់នេះ គឺផ្តោតលើការពិភាក្សា ស៊ីជម្រៅ ដើម្បីពង្រីកទំនាក់ទំនង និង កិច្ចសហប្រតិបត្តិការរវាងចិន និង សិង្ហបុរី។ កិច្ចប្រជុំប្រចាំឆ្នាំនេះអនុវត្តន៍តាំងពីឆ្នាំ២០០៤ លើកលែងឆ្នាំកន្លងទៅនេះ។​

ដំណើរការនៃកិច្ចប្រជុំនេះ អ្នកនាំពាក្យក្រសួងការបរទេសចិន​ថ្លែងថា ចិនមើលឃើញថា សិង្ហបុរីគឺជាសមាជិកដ៏សំខាន់មួយរបស់ សហគមន៍អាស៊ាន និង ចង់ពង្រឹងកិច្ចសហប្រតិបត្តិការជាមួយសិង្ហបុរីឲ្យកាន់តែរឹងមាំទៅថ្ងៃអនាគត។​

ចំណុចនេះ ត្រូវបានថ្លែងបន្ថែមដោយ ឧបនាយករដ្ឋមន្ត្រីលោក​ Zhang Gaoli នៅថ្ងៃចន្ទនេះថា ចិន និង សិង្ហបុរីមានការទំនាក់ទំនងគ្នាកាន់តែរឹងមាំខ្លាំងឡើងពីមួយថ្ងៃទៅមួយថ្ងៃ។​