តុលាការកំពូលបានសម្រេចលើកពេលសវនាការ នៅព្រឹកនេះ ពាក់ព័ន្ធនឹងសំណើរបស់មេធាវីការពារក្ដី ដែលសុំឲ្យមន្ដ្រីសិទ្ធិមនុស្សអាដហុក និងមន្រ្តីគជបបាននៅក្រៅឃុំ។
បន្ទាប់ពីរងចាំអស់រយៈពេលជិត៣ម៉ោងនៅព្រឹកថ្ងៃចន្ទនេះ លោក ហួន ជុនឌី ជាមេធាវីការពារក្ដី បានប្រាប់អ្នកសារព័ត៌មានថា តុលាការកំពូលបានសម្រេចលើកពេលសវនាការទៅថ្ងៃទី៦មីនាឆ្នាំ២០១៧វិញ។ លោកបញ្ជាក់ថា ការខកខានសវនាការនៅព្រឹកនេះ គឺបណ្ដាលមកពីមានកំហុសឆ្គងបច្ចេកទេស ដោយថា មន្ដ្រីពន្ធនាគារមិនបានទទួលដីកាពីតុលាការ ដើម្បីនាំខ្លួនជនជាប់ចោទ ពីពន្ធនាគារព្រៃស មកកាន់តុលាការកំពូលឡើយ។
លោកបន្ដថា ការលើកពេលសវនាការនេះ អាចធ្វើឲ្យប៉ះពាល់ដល់សិទ្ធិរបស់កូនក្ដី ដែលថាគួរទទួលបានការជំនុំជម្រះក្ដីដោយឆាប់រហ័ស។
លោកថា៖ «រឿងហ្នឹង តុលាការគាត់ពន្យារពេលសវនាការវិញ ដោយសារមានបញ្ហារអាក់រអួលរឿងបញ្ជូនលិខិត ឲ្យដល់កូនក្ដីនៅពន្ធនាគារ។ វាអាចជាការប៉ះពាល់ដល់រយៈពេលសវនាការដែលឆាប់រហ័ស គឺវាអាចប៉ះពាល់ខ្លះ។ ការពន្យារពេលនេះ ក៏អាចជាឪកាសមួយសម្រាប់ឲ្យកូនក្ដីរបស់យើង មានឪកាសបង្ហាញហេតុផលរបស់គាត់នៅមុខតុលាការបានច្បាស់លាស់ដូចគ្នាដែរ»។
លោក ហួន ជុនឌី ជាមេធាវីការពារក្ដី បានបន្ថែមថា ការពន្យារពេលនេះ ក៏មានផលប្រយោជន៍ខ្លះដែរ ដើម្បីឲ្យកូនក្ដីរបស់លោកបានត្រៀមខ្លួន មុនឡើងសវនាការ នៅពេលខាងមុខ។ ប៉ុន្តែ លោកអះអាងថា ការបន្ដឃុំខ្លួនបណ្ណោះអាសន្នលើមន្ដ្រីការពារសិទ្ធិមនុស្សជារឿងពុំត្រឹមត្រូវ ដែលគិតមកទល់ពេលនេះជិត១០ខែហើយ។
មន្ត្រីការពារសិទ្ធិមនុស្សសមាគមអាដហុក៤នាក់ មាន លោក នី សុខា លោក ណៃ វ៉ង់ដា លោក យី សុខសាន្ត និងលោកស្រី លឹម មុន្នី រួមទាំងមន្ដ្រី គ.ជ.ប ម្នាក់ទៀត លោក នី ចរិយា ត្រូវតុលាការសម្រេចឃុំខ្លួនបណ្តោះអាសន្ននៅពន្ធនាគារព្រៃស កាលពីដើមឆ្នាំ២០១៦ ដោយចោទប្រកាន់ពីបទ «សូកប៉ាន់សាក្សី» ទាក់ទិនសំណុំរឿងដ៏ចម្រោងចម្រាស់មួយ សីពាក់ព័ន្ធនឹងកញ្ញា ខុម ចាន់តារាទី ហៅ “ស្រីមុំ” ដែលត្រូវគេទម្លាយថា មានទំនាក់ទំនងស្នេហាដ៏ចម្រូងចម្រាស់ជាមួយមេដឹកនាំគណបក្សប្រឆាំងលោក កឹម សុខា។
កាលពីថ្ងៃព្រហស្បតិ៍ទី២៣ខែកុម្ភៈ បណ្ដឹងសុំនៅក្រៅឃុំរបស់មេធាវីការពារក្ដី ក៏ត្រូវបានច្រានចោលដោយសាលាឧទ្ធរណ៍ជាលើកទី៤ផងដែរ៕