មនុស្សពីរក្រុមបានរុញច្រាននិងវាយតប់គ្នានៅឆ្នេរសមុទ្រភាគខាងត្បូងនៃរដ្ឋកាលីហ្វ័រញ៉ា ដោយសារមួយក្រុមគាំទ្រនិងមួយក្រុមទៀតប្រឆាំង ត្រាំ ហើយហេតុការណ៍នេះ នាំសមត្ថកិច្ចចេញមុខអន្តរាគមន៍និងឃាត់ខ្លួនមនុស្សចំនួ៤នាក់។
តាមការចុះផ្សាយរបស់ ABC បានឲ្យដឹងថា មនុស្ស២០០០នាក់ ប្រមូលផ្តុំនៅឆ្នេរ Bolsa Chica តវ៉ាប្រឆាំង ត្រាំ ពេលនោះមានមនុស្សមួយក្រុមទៀតមានគ្នាប្រមាណ៣០នាក់ បានយកម្សៅម្រេចបាញ់លើអ្នកតវ៉ា បណ្តាលឲ្យមានកំហឹងផ្ទុះឡើងមានការវាយតប់ ទើបឈានដល់ការចាប់ខ្លួននិងមានរបួសស្រាល២នាក់។
អ្នកតវ៉ាប្រឆាំង ត្រាំ ថ្លែងថា ពួកគេខឹងចំពោះការយកម្សៅម្រេចទៅបាញ់ដាក់ភ្នែកពួកគេទើបឈានដល់ការវាយតប់គ្នានៅលើឆ្នេរខ្សាច់នោះតែម្តង។ អ្នកតវ៉ាបញ្ជាក់ថា មុនហិង្សារផ្ទុះឡើងពួកគេបានត្រៀមរៀបចំ បញ្ឈប់ការតវ៉ាទៅហើយ ហេតុការណ៍នោះក៏កើតឡើង។
នៅក្នុងដើមខែមីនា មានការតវ៉ាប្រឆាំងនិងគាំទ្រ ត្រាំ នៅ Berkeley និង California ហើយកើតហេតុវាយតប់គ្នា ដែលបានបណ្តាល្យមនុស្សជា១០នាក់រងរបួស៕