ខណៈមានការរិះគន់ជាបន្តបន្ទាប់ថា យន្តការប្រជាធិបតេយ្យនៅកម្ពុជា កំពុងដើរថយក្រោយយ៉ាងគំហុកមកនោះ លោកនាយករដ្ឋមន្ត្រី ហ៊ុន សែន អះអាងថា លោកចង់ឃើញការបោះឆ្នោតខាងមុខ ដោយសរីនិងយុត្តិធម៌។
ក្នុងពីធីសម្ពោធសាលារៀន នៅខេត្តក្រចេះ នាថ្ងៃទី២៧ខែមីនានេះ លោក ហ៊ុន សែន ថ្លែងថា អាជ្ញាធរត្រូវធានាពីសន្តិសុខជូនពលរដ្ឋក្នុងពិធីបុណ្យចូលឆ្នាំខ្មែរ រហូតដល់ក្រោយថ្ងៃបោះឆ្នោត។
លោក ហ៊ុន សែន ក៏បានអំពាវនាវលាយឡំនិងការព្រមានថា ដើម្បីធានាដល់ភាពត្រឹមត្រូវនៃការបោះឆ្នោត លោកថា គណបក្សនយោបាយទាំងអស់ត្រូវប្រកួតប្រជែងគ្នា តាមរយៈគោលនយោបាយតែរៀងខ្លួនៗ ជាងប្រើពាក្យជេរប្រមាថ ទៅលើគណបក្សដទៃ នាំឲ្យប្រឈមនឹងការចាត់វិធានការពីតុលាការ។
លោកថា៖ «ធ្វើយ៉ាងណាឲ្យបរិយាកាស ទាំងការចូលឆ្នាំ សប្បាយរីករាយ និងការបោះឆ្នោត ប្រព្រឹត្តទៅដោយសន្តិភាព សន្តិសុខ ដោយសេរី និងយុត្តិធម៌ គ្មានការគំរាមកំហែង»។
នៅពេលថ្មីៗនេះ សហគមន៍ជាតិនិងអន្តរជាតិ បានចេញសេចក្តីថ្លែងការណ៍ ជាបន្តបន្ទាប់ បង្ហាញការព្រួយបារម្ភពីភាពស្របច្បាប់នៃការបោះឆ្នោតខាងមុខ ខណៈបក្សកាន់អំណាចកែច្បាប់ស្តីពីគណបក្សនយោបាយ និងថាចំណាត់ការ របស់តុលាការ ដែលបានចាប់ឃុំខ្លួនសកម្មជនបក្សប្រឆាំង អ្នកការពារសិទ្ធិមនុស្ស មន្ត្រី គជប និងសកម្មជនដីធ្លីថាជា ការរឹតបន្តឹងសេរីភាពបញ្ចេញមតិ។
ការផ្ញើសារនយោបាយ របស់មេដឹកនាំបក្សកាន់អំណាចនៅថ្ងៃចន្ទនេះ ស្របគ្នានឹងសារនយោបាយ របស់មេដឹកនាំប្រឆាំងដែលបានសរសេរនៅលើហ្វេសប៊ុកកាលថ្ងៃម្សិលមិញដែរ។
លោក កឹម សុខា បានសរសេរថា ដើម្បីបានប្រយោជន៍ទៅប្រជាពលរដ្ឋនិងប្រទេសជាតិ មានតែការប្រកួតគ្នា តាមគោលនយោបាយ និងមិនត្រូវប្រើពាក្យអសុរោះ ដៀលត្មេះវាយប្រហារគ្នា បង្កការឈឺចាប់ដល់ភាគីម្ខាងទៀត នោះទេ។
លោកថា៖ «យើងប្រកួតគ្នាលើ “គោលនយោបាយនៃគណបក្សរៀងៗខ្លួន” ដើម្បីបានផលប្រយោជន៍ទៅប្រជាពលរដ្ឋ និងប្រទេសជាតិយើង។ យើងមិនត្រូវប្រកួតគ្នាលើពាក្យសម្ដី អសុរោះ ដៀលត្មះ វាយប្រហារ ធ្វើទុក្ខបុកម្នេញបង្កការឈឺចាប់ឲ្យគ្នានោះឡើយ។ យើងទុកជូនប្រជាពលរដ្ឋខ្មែរ ដែលជាម្ចាស់ឆ្នោតជាអ្នកសម្រេចចុះ»។
នាយកប្រតិបត្តិអង្គការឃ្លាំមើលការបោះឆ្នោតមួយហៅកាត់ថា NICFEC លោក សំ គន្ធាមី បានសាទរទៅនឹងការលើកឡើងរបស់អ្នកនយោបាយទាំងពីរនេះ ដោយថា ការបោះឆ្នោតមួយ ដោយតម្លាភាព ត្រឹមត្រូវនិងយុត្តិធម៌គឺជាការចង់បានរបស់ សហគមន៍ជាតិនិងអន្តរជាតិ ដែលប្រកាន់គោលការណ៍ប្រជាធិបតេយ្យ។
ប៉ុន្តែអ្នកឃ្លាំមើលការបោះឆ្នោតរូបនោះ ជំរុញឲ្យរដ្ឋាភិបាល ដោះលែង សកម្មជននយោបាយ អ្នកការពារសិទ្ធិមនុស្ស សកម្មជនដីធ្លី ឲ្យមានសេរីភាព ដើម្បីឲ្យពួកគេបានចូលរួមក្នុងកិច្ចការសង្គមដូចមានចែងនៅក្នុងច្បាប់ និងថាដើម្បីជាភស្តុតាងមួយទៀតបញ្ជាក់ថា រដ្ឋាភិបាលកំពុងស្វែងរកប្រជាប្រិយភាព តាមការប្រកួតប្រជែងមួយដោយតម្លាភាព ខណៈការបោះឆ្នោតជិតមកដល់។
លោកថា៖ «សកម្មជន[សិទ្ធិមនុស្ស]ដែលកំពុងជាជាប់ឃុំឃាំងហ្នឹងក្តី និងសកម្មជននយោបាយអីក៏ដោយ ដែលនេះ គាត់[រដ្ឋាភិបាល] គួរតែអន្តរាគមន៍ឲ្យពួកគាត់បាននៅក្រៅឃុំ ដើម្បីឲ្យពួកគាត់ហ្នឹងបានចូលរួមក្នុងវិស័យនយោបាយ ឲ្យបានគ្រប់ៗគ្នា។ អានឹងហើយការប្រកួតប្រជែងដោយយុត្តិធម៌»។
យ៉ាងណាក៏ដោយលោក ហ៊ុន សែន អះអាងថា ពលរដ្ឋនឹងនៅតែបោះឆ្នោតគាំទ្រគណបក្សប្រជជានជនកម្ពុជា បានបន្តដឹកនាំប្រទេស ដែលលោកថាបានខិតខំប្រឹងប្រែងតម្លើងប្រាក់ខែមន្ត្រីរាជការ លោកគ្រូ អ្នកគ្រូ ការកសាងហេដ្ឋារចនាសម្ព័ន្ធ ស្ពាន ថ្នល់ សាលារៀន ទឹកភ្លើង ជាដើម៕
