ក្នុងចំណោមតារាចាស់ក្មេងទាំងអស់ដែលបានបង្ហាញខ្លួនក្នុងពិធីសម្ពោធរឿង «កំពូលអ្នកសែលហ្វី»កាលពីថ្ងៃទី២៦មីនា គេកត់សម្គាល់ថាមានតែពិធីករ លោក សុខ រ៉ាស៊ី ម្នាក់ប៉ុណ្ណោះ ដែលត្រូវបានផលិតករបរទេសដែលត្រូវគេស្គាល់ថា មានស្នាដៃរាប់មិនអស់ក្នុងការផលិតភាពយន្តនៅក្នុងផលិតកម្មខ្មែរមេគង្គសរសើរមិនដាច់ពីមាត់ រហូតធ្វើអោយអ្នកចូលរួមនៅក្នុងពិធីផ្ដោតការចាប់អារម្មណ៍។ យ៉ាងណាមិញ ឆ្លើយតបនឹងការសរសើរជាសាធារណៈនោះ លោកសុខ រ៉ាស៊ី បានអះអាងថា ខ្លួនមិនហ៊ានទទួលយកទាំងស្រុងនោះទេ ប៉ុន្តែលោកថានឹងខំប្រឹងប្រែងបន្ថែមទៀត ដើម្បីអាជីព និងដើម្បីក្រពះរបស់ខ្លួន។
ក្នុងពេលកាន់ក្បាលមេក្រូប្រកាសដាក់បញ្ចាំងរឿង «កំពូលអ្នកសែលហ្វី» លោក Matthew Robinson ផលិតកររឿង «តម្លៃស្នេហ៍» ដែលបានឈ្នះពានមហោស្រពភាពយន្តថ្នាក់ជាតិកាលពីចុងឆ្នាំ២០១៧ថ្មីនៅកម្ពុជា បានប្រកាសដាក់ក្បាលមេក្រូថា ក្នុងចំណោមតារាខ្មែរទាំងអស់ដែលលោកបានរួមការងារជាមួយ លោកសូមសរសើរចំពោះពិធីករ លោក សុខ រ៉ាស៊ី ថាជាតារាដែលមានទេពកោសល្យម្នាក់ ដោយសារតែលោកក្រៅពីមានជំនាញសំនាញល្អ ជាពិធីករល្អ ហើយលោកក៏ជាតារាសម្ដែងល្អម្នាក់ ក្រោយពីបានជ្រើសអោយមករួមការងារជាមួយគ្នា។
លោកថាមានការភ្ញាក់ផ្អើល ដែលធ្លាប់បានឃើញលោកសុខ រ៉ាស៊ី តែក្នុងអាជីពជាពិធីករ ហើយឃើញថាលោកមានវោហាស័ព្ទ និងភាពប៉ិនប្រសព្វនៅក្នុងកម្មវិធី ប៉ុន្តែនៅពេលជ្រើសអោយសម្ដែងក្នុងរឿង «កំពូលអ្នកសែលហ្វី» គឺរឹតតែល្អទៅទៀត បើទោះជាលោកបានសម្ដែងតែប៉ុន្មានប្លង់នៅក្នុងរឿង។ លោកប្រកាសដដែលជាដដែលថា គឺជារឿងកម្រណាស់ដែលតារាមួយរូប មានទេពកោសល្យទាំងអាជីពពិធីករ និងទាំងការសម្ដែង ដោយលោកប្រកាសថាខ្លួនមានមោទនភាពយ៉ាងខ្លាំងដែលបានរួមការងារជាមួយតារាមួយរូបដែលមានទេពកោសល្យដល់ម្លឹង។
ក្រៅពីការសរសើរយ៉ាងពេញៗមាត់ដាក់ក្បាលមេក្រូ លោក Matthew Robinson ក៏បានអោបក្រៀកលោក សុខ រ៉ាស៊ី នៅលើវេទិកា ដែលធ្វើអោយលោកលេចធ្លោរដាច់ឆ្ងាយពីតួអង្គឯក និងជាតួសំខាន់ក្នុងរឿងនៅក្នុងពិធីនោះ។ យ៉ាងណាមិញ លោក Matthew Robinson បានអះអាងថានៅក្នុងភាពយន្តមួយ មិនមែនសំខាន់តែតួអង្គឯកនោះទេ ប្រសិនបើតួអង្គបន្ទាប់បន្សំសម្ដែងមិនបានល្អ ឬធ្វើអោយមានឆ្គាំឆ្គងក្នុងផ្ទៃរឿង។
លោក សុខ រ៉ាស៊ី បានអះអាងថាសប្បាយចិត្តដែលបានទទួលការសរសើរពីលោក Matthew Robinson ដែលជាផលិតករល្បីរបស់ផលិតកម្មខ្មែរមេគង្គ នៅកណ្ដាលចំណោមក្នុងពេលនោះ។ ប៉ុន្តែលោកថាខ្លួនមិនអាចទទួលយកបាននោះទេ ដោយសារតែលោកក៏ជាតារាជំនាន់ ហើយគិតថាខ្លួនមិនទាន់មានសមត្ថភាពគ្រប់គ្រាន់ដូចអ្វីដែលបានសរសើរនៅឡើយ។ លោកថាខ្លួនត្រូវការហ្វឹកហាត់សមត្ថភាព និងត្រូវប្រឹងប្រែងបន្ថែមទៀត ដោយមិនអាចទទួលបានការសរសើរពីផលិតករម្នាក់នេះ ឬម្នាក់នោះ ហើយគិតថាអ្វីដែលខ្លួនមានគ្រប់គ្រាន់នោះទេ។
លោកថាកន្លងមកធ្លាប់បានសម្ដែងភាពយន្តភាគទូរទស្សន៍ខ្លះៗ ប៉ុន្តែសម្រាប់ភាពយន្តខ្នាតធំ គឺជាលើកទី១ប៉ុណ្ណោះដែលផលិតកម្មខ្មែរមេគង្គ ជ្រើសអោយសម្ដែង ខណៈដែលលោកគិតថាខ្លួនសម្ដែងមិនទាន់ល្អឥតខ្ចោះតាមការចង់បានរបស់ផលិតករនោះទេ ទើបលោកសម្ដែងការភ្ញាក់ផ្អើលនៅពេលដែលផលិតករលោក Matthew Robinson យកលោកធ្វើជាឧទាហរណ៍ក្នុងថ្ងៃសម្ពោធរឿង«កំពូលអ្នកសែលហ្វី» ដែលលោកបានហៅថាការលើកឡើងថានោះ គឺជាអ្វីដែលលោកកាន់តែបារម្ភប្រសិនបើថ្ងៃណាមួយ លោកឈប់ទទួលបាននូវការសរសើរ។
លោក សុខ រ៉ាស៊ីបញ្ជាក់ថា ការសម្ដែងមិនមែនជាគោលដៅរបស់ខ្លួននោះទេ ប៉ុន្តែបើមានការផ្ដល់ឱកាសគឺលោកត្រូវតែធ្វើអោយបានល្អ បើទោះជាការសម្ដែងនោះតម្រូវអោយថតតែមួយប្លង់ៗ ឬអោយដើរតួមិនត្រូវនឹងចំណូលចិត្ត៕
