តុលាការរាជធានីភ្នំពេញបានសម្រេចឃុំខ្លួន មេឃុំរបស់គណបក្សសម រង្ស៊ី លោក ស៊ាង ចែត បន្ទាប់ពីសាកសួរពេញមួយថ្ងៃ ជុំវិញព័ត៌មានដែលអង្គភាពប្រឆំាងអំពើពុករលួយចោទថា មេឃុំរូបនោះយកប្រាក់៥០០ដុល្លារទៅឲ្យម្តាយកញ្ញាស្រីមុំ ជាថ្នូរកុំឲ្យនិយាយរឿងពិត ពីទំនាក់ទំនងស្នេហាជាមួយលោក កឹម សុខា។
មេឃុំស្រករបស់គណបក្សសមរង្ស៊ី ក្នុងខេត្តកំពង់ចាម លោក ស៊ាង ចែត ត្រូវបានសមត្ថកិច្ចអង្គភាពប្រឆាំងអំពើពុករលួយ ឃាត់ខ្លួននៅថ្ងៃទី២៤ ខែមេសា ឆ្នាំ២០១៦ ទៅតាមចម្លើយនៅក្នុងលិខិតចំហររបស់កញ្ញា ខុម ចាន់តារ៉ាទី ហៅ ស្រីមុំ ដែលបានអះអាងថា នាងមានទំនាក់ទំនងស្នេហាលួចលាក់ជាមួយ លោក កឹម សុខា។
ក្រោយពីការសាកសួរចប់នៅម៉ោងជាង៦ល្ងាចនេះ មេធាវីការពារ លោក សំ សុគង់ មានប្រសាសន៍ថាតុលាការសម្រេចបញ្ជូនលោក ស៊ាង ចែត ទៅពន្ធនាគារ ដោយចោទពីបទសូកប៉ាន់សាក្សី តាមមាត្រា៥៤៨នៃក្រមព្រហ្មទណ្ទ ដែលប្រឈមមានទោស៥ទៅ១០ឆ្នាំ។ លោកយល់ថាការចោទប្រកាន់នោះមិនសមរម្យនោះទេ។ លោកបញ្ជាក់ថាលោកបានស្នើសុំឲ្យកូនក្តីនៅក្រៅឃុំ តែតុលាការបានបដិសេធ។
គណបក្សសង្គ្រោះជាតិបានចេញសេចក្តីថ្លែងការណ៍ថ្កោលទោសចំពោះការឃាត់ខ្លួននេះនិងបានហៅការឃាត់ខ្លួននេះថា មានចរិតដូចរបបខ្មែរក្រហម គឺធ្វើឡើងតាមការឆ្លើយដាក់ពីបុគ្គលកញ្ញា ស្រីមុំ តែម្នាក់។ ក្នុងសេចក្តីថ្លែងការណ៍ គណបក្សនេះបានទាមទារឲ្យដោះលែងលោក ស៊ាង ចែត ជាបន្ទាន់ និងដោយឥតលក្ខខណ្ឌ៕