កូនប្រុសរបស់លោក Mann Win Khaing Than ប្រធានថ្មីរបស់សភាមីយ៉ាន់ម៉ា បានលាលែងពីតំណែងជាជំនួយការផ្ទាល់របស់ឪពុករបស់លោក បន្ទាប់ពីការិយាល័យប្រធានាធិបតីបានចេញបទបញ្ជាមួយហាមឃាត់មិនឲ្យមន្ត្រីរដ្ឋាភិបាលយកសាច់ញាតិធ្វើជាជំនួយការផ្ទាល់។
ក្រោយការលាលែងរបស់កូនប្រុសប្រធានសភា តំណែងជំនួយការផ្ទាល់នេះត្រូវបានជំនួសដោយអគ្គលេខាធិការរងនៃរដ្ឋសភាវិញ។ នេះបើយោងតាមភ្នាក់ងារព័ត៌មានស៊ីនហួរ (Xinhua)។
ពុំមានការបញ្ជាក់ពីមូលហេតុនៃការលាលែងនោះទេ តែការលាលែងនេះគឺធ្វើឡើងក្រោយការិយាល័យប្រធានាធិបតីកាលពីថ្ងៃចន្ទបានចេញបទបញ្ជាមួយ ហាមមន្ត្រីរដ្ឋាភិបាលទាំងអស់មិនឲ្យតែងតាំងប្ដីឬប្រពន្ធ កូន កូនប្រសារ ក្មួយ ឬចៅរបស់ខ្លួនជាជំនួយការផ្ទាល់ខ្លួននោះទេ។ បទបញ្ជានោះបានកំណត់ថាមានតែមន្ត្រីសាធារណៈប៉ុណ្ណោះដែលអាចទទួលតំណែងជាជំនួយការផ្ទាល់នេះបាន។
យោងតាមរបាយការណ៍ផ្សេងៗ អតីតប្រធានសភាលោក Aung Myint ក៏បានតែងតាំងកូនប្រុសរបស់លោកជាជំនួយការផ្ទាល់ផងដែរនិងបានបំពេញការងាររយៈពេល៥ឆ្នាំ។
ទន្ទឹមនឹងនេះ កាលពីថ្ងៃទី៥ ខែមេសា ការិយាល័យរបស់លោកប្រធានាធិបតីក៏បានចេញបទបញ្ជាមួយ ហាមប្រាមសមាជិកគណៈរដ្ឋមន្ត្រី និងបុគ្គលិក មន្ត្រីរដ្ឋាភិបាល ទាំងអស់មិនឲ្យទទួលសំណូក ដែលជាផ្នែកមួយនៃវិធានការប្រយុទ្ធប្រឆាំងអំពើពុករលួយនៅក្នុងប្រទេសនេះ។
បទបញ្ជានេះបានព្រមានថា អំពើពុករលួយបានរីករាលដាលក្នុងប្រទេសធ្វើឲ្យប៉ះពាល់ដល់សង្គមនិងសេដ្ឋកិច្ច និងនីតិរដ្ឋ។ រដ្ឋាភិបាលថ្មីមានគោលបំណងចង់លុបបំបាត់ទាំងស្រុងនូវអំពើពុករលួយជាទម្លាប់បែបនេះនៅក្នុងរយៈពេលខ្លី៕
ប្រភព៖ Global Times