លោកនាយករដ្ឋមន្ត្រីហ៊ុន សែន អំណាវនាវដល់ប្រជាពលរដ្ឋកុំឲ្យជឿ លើគណបក្សតូចៗ ដែលលោកថា បានតែសន្យាហើយមិនបានធ្វើអ្វីទាំងអស់សម្រាប់ប្រទេសជាតិនោះទេ។
ស្របពេលដែលគ្រប់គណបក្សនយោបាយទាំងអស់ដែលបានចុះឈ្មោះប្រកួតប្រជែងកំពុងធ្វើយុទ្ធនាការឃោសនាបោះឆ្នោតនោះ នៅថ្ងៃសៅរ៍នេះ លោកនាយករដ្ឋមន្ត្រីហ៊ុន សែនសរសេរនៅលើហ្វេសប៊ុករបស់លោកថា គណបក្សប្រជាជនជា គណបក្សដែលធំជាងគេ បានបំពេញការងារសម្រាប់ជាតិច្រើនជាងគេ និង មានការគាំទ្រច្រើនជាងគេ។ ទន្ទឹមនឹងនេះ លោកក៏បានអំពាវនាវដល់ ពលរដ្ឋកុំឲ្យបោះឆ្នោតគាំទ្រគណបក្ស ដែលលោកចាត់ទុកថា ជាបក្សតូចៗមិនបានធ្វើអ្វីសម្រាប់ជាតិ។ លោកសរសេរថា៖« ច្បាស់ណាស់ “គណបក្សប្រជាជនកម្ពុជា” គឺជាគណបក្សដ៏ធំបំផុតរបស់កម្ពុជា មានស្នាដៃដឹកនាំកសាងប្រទេសយ៉ាងច្រើនឥតគណនា។ យើងមិនអាចជឿទុកចិត្តទៅលើបក្សនយោបាយតូចៗ ដែលមិនបានកសាងអ្វីសម្រាប់ប្រទេស ហើយបានតែតែឃោសនា..សន្យាមាត់ទទេថានឹងធ្វើនេះ ធ្វើនោះ….បើជាប់ឆ្នោត (?) តើទុកចិត្តបានត្រង់ណា? គឺមិនអាចទេ!»
គណបក្សដែលចូលរួមប្រកួតប្រជែងការបោះឆ្នោតក្រុមប្រឹក្សាឃុំសង្កាត់នៅថ្ងៃទី៤ខែមិថុនានេះ គឺមានគណបក្សនយោបាយចំនួន១២ចូលរួម។ ក្នុងនោះមានតែគណបក្សប្រជាជនកម្ពុជា និងគណបក្សសង្គ្រោះជាតិ ដែលបក្សទាំងពីរបានដាក់បេក្ខជនប្រកួតប្រជែងគ្រប់ឃុំសង្កាត់ទាំងអស់ទូទាំងប្រទេស។
