អ្នកនាំពាក្យគណបក្សប្រជាជនកម្ពុជា(CPP) ប្រកាសថ្កោលទោសគណបក្សសង្គ្រោះជាតិ (CNRP) បន្ទាប់ពីបក្សប្រឆាំងចេញសេចក្តីថ្លែងការណ៍ថា ប្រព័ន្ធផ្សព្វផ្សាយមានភាពលម្អៀង មិនឯករាជ្យ និងមានការរើសអើង ចំពោះគណបក្សនៅក្រៅរដ្ឋាភិបាល កាលពីយុទ្ធនាការឃោសនាបោះឆ្នោតឃុំសង្កាត់អាណត្តិទី៤កន្លងទៅ។
សេចក្តីថ្លែងការណ៍នៅថ្ងៃជាមួយគ្នា កាលពីម្សិលមិញ អ្នកនាំពាក្យ CPP បញ្ជាក់ថា ប្រព័ន្ធផ្សព្វផ្សាយឯកជនទាំងអស់ បានអនុវត្តត្រឹមត្រូវតាមច្បាប់ ហើយការដែលប្រព័ន្ធទូរទស្សន៍មិនបានផ្សាយឲ្យ CNRP ដោយសារ CNRP មិនបានទៅទាក់ទងចុះកិច្ចសន្យាជួលការផ្សាយឡើយ។
ក្នុងសេចក្តីថ្លែងការណ៍របស់CPP បានបញ្ជាក់ទៀតថា «អ្នកនាំពាក្យគណបក្សប្រជាជនកម្ពុជា សូមថ្កោលទោសយ៉ាងដាច់អហំការ ចំពោះការនិយាយមួលបង្កាច់ គ្មានការពិត និងគ្មានការទទួលខុសត្រូវ របស់គណបក្សសាង្គ្រោះជាតិ ដែលធ្វើឲ្យមានការភាន់ច្រឡំដល់សាធារណៈមតិជាតិ និង អន្តរជាតិយ៉ាងធ្ងន់ធ្ងរ»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានមានប្រសាសន៍បន្ថែមថា ទាំងអង្គការក្រៅរដ្ឋាភិបាលមួយចំនួន និងគណបក្សប្រឆាំងវាយតម្លៃសភាពការណ៍មិនត្រូវទេ «និយាយវាជ្រុលពេក! គេធ្វើកិច្ចសន្យាជួលហើយ តើយើងមានទៅជួលគេទេ? យើងអត់ជួលបានអត់មានអ្នកណាផ្សាយឲ្យ។ បើទៅជួលហើយគេមិនព្រមជួលឲ្យយើងអាហ្នឹងចាំយើងប្រកាន់ យើងនិយាយអញ្ចឹង! នេះនិយាយអត់សច្ចៈធម៌អីបន្តិច អស់លោកហ្នឹងទាល់តែគណបក្សប្រជាជនចាញ់ អាហ្នឹងបានអស់លោកថាយុត្តិធម៌ត្រឹមត្រូវ គ្មានការគម្រាមកំហែង»។
ប្រតិកម្មរបស់អ្នកនាំពាក្យគណបក្សកាន់អំណាចនេះគឺដូចគ្នានឹងប្រតិកម្មរបស់សមាគមទូរទស្សន៍កម្ពុជាដែលបានចេញសេចក្តីថ្លែងការណ៍ដោយបន្ទោសថាមកពីគណបក្សប្រឆាំងមិនបានទាក់ទងជួលម៉ោងផ្សាយ។
ចំណែកអ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា លោកមិនចង់ចំណាយពេលឆ្លើយតបរឿងនេះទេ «ខ្ញុំមិនចង់ប្រើប្រាស់ពេលវេលាឆ្លើយតបរឿងដែលឥតប្រយោជន៍ទេ! ខ្ញុំគ្រាន់តែសួរថា មានទូរទស្សន៍ណាមួយដែលបានប្រកាសម៉ោងលក់តាមការណែនាំរបស់ គ.ជ.ប ទេ? ហើយតើ គ.ជ.ប បានធ្វើការពិន័យទូរទស្សន៍ទាំងអស់នោះយ៉ាងម៉េចខ្លះ?»។
សេចក្តីថ្លែងការណ៍របស់គណបក្សសង្រ្គោះជាតិ កាលពីម្សិលមិញ បានលើកឡើងថា ប្រព័ន្ធផ្សព្វផ្សាយភាគច្រើនមានភាពលម្អៀង មិនឯករាជ្យ និងមានការរើសអើង ដោយថានៅថ្ងៃចុងក្រោយនៃការឃោសនា ទូរទស្សន៍ទាំងអស់បានផ្សាយបន្តផ្ទាល់ឲ្យយុទ្ធនាការរបស់គណបក្សប្រជាជនកម្ពុជា ប៉ុន្តែមិនបានផ្សាយពីយុទ្ធនាការរបស់គណបក្សដទៃ។
ក្នុងយុទ្ធនាការថ្ងៃចុងក្រោយនោះ លោក ហ៊ុន សែន ប្រធានគណបក្សប្រជាជនកម្ពុជា បានចេញមុខឃោសនាជាលើកដំបូងក្នុងឆាកនយោបាយរបស់លោកដោយបានអះអាងថា គណបក្សកាន់អំណាចបានជួលទូរទស្សន៍ចំនួន៨ប៉ុស្តិ៍ឲ្យផ្សាយពីសកម្មភាពរបស់លោក ដោយក្នុងមួយនាទី៣០០ដុល្លារ។
បើសិនជាជួលក្នុងតម្លៃដូចនេះ គឺគណបក្សប្រជាជនត្រូវចំណាយអស់ប្រហែល៤០ម៉ឺនដុល្លារគ្រាន់តែជួលទូទស្សន៍ផ្សាយ៣ម៉ោងនៃយុទ្ធនាការចុងក្រោយរបស់ខ្លួន។
នាយកប្រតិបត្តិ នៃគណៈកម្មាធិការអព្យាក្រឹតនិងយុត្តិធម៌ដើម្បីបោះឆ្នោតដោយសេរីនិងត្រឹមត្រូវនៅកម្ពុជា ឬហៅថាអង្គការនិចហ្វិក (NICFEC) និងជាសមាជិកបន្ទប់ស្ថានការណ៍ស្ដីពីការបោះឆ្នោត លោក សំ គន្ធាមី មានប្រសាសន៍ថា ការបោះឆ្នោតឃុំសង្កាត់ បានបញ្ចប់ដោយរលូន និងទទួលយកអស់ហើយ មិនគួរមានការចេញសេចក្តីថ្លែងការណ៍ឆ្លងឆ្លើយគ្នានាំឲ្យមានសភាពការណ៍តានតឹងទេ៖ «រឿងហ្នឹងវាចប់អស់ហើយ! មិនគួរលើកមកនិយាយទេ បើអាចកែរលម្អរគួរសួរទៅ គ.ជ.ប ឲ្យឆ្លើយវិញ ព្រោះ គ.ជ.ប អ្នកគ្រប់គ្រង យុទ្ធនាការឃោសនាហ្នឹង គ.ជ.ប អ្នកគ្រប់គ្រងទាំងអស់ ហើយ ប្រព័ន្ធផ្សព្វផ្សាយអីទាំងអស់ហ្នឹង។ ទុកឲ្យ គ.ជ.ប អ្នកឆ្លើយតបវិញទើបល្អជាង»៕