អាជ្ញាធរថៃបានចោទប្រកាន់អ្នកការពារសិទ្ធិមនុស្សបីនាក់ថាបានប្រព្រឹត្តបទឧក្រិដ្ឋព្រហ្មទណ្ឌបរិហារកេរ្តិ៍ ករណីចេញរបាយការណ៍កម្រមួយស្តីពីការធ្វើទារុណកម្មអ្នកជាប់ឃុំដែលបះបោរនៅភាគខាងត្បូងប្រទេស។
ក្នុងរបាយការណ៍របស់អ្នកការពារសិទ្ធិមនុស្សបានបញ្ជាក់ថាបានសម្ភាសន៍អ្នកជាប់ឃុំចំនួន៥៤នាក់ ហើយពួកគេបានពិពណ៌នាពីការធ្វើទារុណកម្មផ្លូវកាយនិងផ្លូវចិត្តដោយទាហាននិងនគរបាលនៅភាគខាងត្បូង។
អ្នកទាំងបីនោះមានឈ្មោះ Pornpen Khongkachonkiet, Anchana Heemmina និង Somchai Homlaor ពួកគេត្រូវបានចោទប្រកាន់កាលពីថ្ងៃអង្គារម្សិលមិញពីបទបរិហារកេរ្តិ៍ត្រូវជាប់ពន្ធនាគារ២ឆ្នាំនិងបទបំពានលើច្បាប់កុំព្យូទ័រត្រូវជាប់ពន្ធនាគារ៣ឆ្នាំ។ នេះបើតាមសារព័ត៌មាន Aljazeera។
ក្រុមអ្នកសិទ្ធិមនុស្សបានលើកឡើងថានេះជាទម្លាប់ទៅហើយដែលរដ្ឋាភិបាលប្រើទាំងកម្លាំងយោធានិងច្បាប់ ដើម្បីការពារអំណាចហើយបំបិទសំឡេងអ្នកហ៊ានរិះគន់៕