អាជ្ញាធរជាតិប្រយុទ្ធប្រឆាំងគ្រឿងញៀន បានបង្ក្រាបក្រុមមុខសញ្ញាចែកចាយគ្រឿងញៀនជាង៤ពាន់ករណី និងឃាត់ខ្លួនជនសង្ស័យបានជាង១ម៉ឺននាក់ នៅទូទាំងប្រទេស ក្នុងយុទ្ធនាការប្រឆាំងគ្រឿងញៀនខុសច្បាប់លើកទី១ មានរយៈពេល៦ខែ។
ក្នុងកិច្ចប្រជុំបូកសរុបលទ្ធផល អនុវត្តផែនការប្រយុទ្ធប្រឆាំងគ្រឿងញៀនខុសច្បាប់លើកទី១ និងកំណត់ទិសដៅដើម្បី អនុវត្តយុទ្ធនាការលើកទី២ នៅព្រឹកថ្ងៃព្រហស្បតិ៍នេះ លោក ស ខេង រដ្ឋមន្ត្រីក្រសួងមហាផ្ទៃ លោក ស ខេង និងជាប្រធានយុទ្ធនាការ ប្រយុទ្ធប្រឆាំងគ្រឿងញៀនខុសច្បាប់ បានថ្លែងជំរុញលើកទឹកចិត្តឲ្យសមត្ថកិច្ចខិតខំបង្ក្រាបបន្ថែមទៀត។ លោក ស ខេងបញ្ជាក់ថា ក្រសួងមានត្រៀមលុយជិត១លានដុល្លារ ដើម្បីធ្វើជារង្វាន់លើកទឹកចិត្តដល់នគរបាលមានស្នាដៃ។
អគ្គស្នងការរងនគរបាលជាតិ លោកម៉ក់ ជីតូ បានឲ្យដឹងថា យុទ្ធនាការប្រយុទ្ធប្រឆាំងគ្រឿងញៀនលើកទី១ រយៈពេល៦ខែ ចាប់ពីថ្ងៃទី០១ ខែមករា ដល់ថ្ងៃទី៣០ ខែមិថុនា ឆ្នាំ ២០១៧នេះ អាជ្ញាធរជាតិ បានបង្ក្រាបក្រុមមុខសញ្ញា ចែកចាយគ្រឿងញៀនបានជាង៤ពាន់ករណី និងឃាត់ខ្លួនជនសង្ស័យបានជាង១ម៉ឺននាក់ នៅទូទាំងប្រទេស៕
ហូរ តុងហាន់
