ព្រះសង្ឃមួយអង្គគង់នៅរាជធានីភ្នំពេញបានប្រកាសនៅថ្ងៃព្រហស្បតិ៍នេះ ពីការប្រមូលស្នាមមេដៃពីប្រជាពលរដ្ឋនៅទូទាំងប្រទេស ដើម្បីប្តឹងទៅកាន់ស្ថាប័ន្ធពាក់ព័ន្ធឲ្យចាត់វិធានការលើប្រធានគណបក្សសម្ព័ន្ធដើម្បីប្រជាធិបតេយ្យលោក ខឹម វាសនា ពាក់ព័ន្ធការចោទថាប្រមាថ សាសនា ជាតិសាសន៍ និងព្រះមហាក្សត្រ។
នៅក្នុងសន្និសីទសារព័ត៌មាននៅរសៀលថ្ងៃព្រហស្បតិ៍នេះ ព្រះតេជគុណ ហោ សុខុន ព្រះចៅអធិការវត្តច្បារអំពៅ មានថេរដីកាថា បណ្តឹងនោះព្រះអង្គធ្វើឡើងមិនមែនជាទំនាស់បុគ្គលនោះទេគឺព្រះអង្គបញ្ជាក់ថា ជារឿងប៉ះពាល់ដល់ជាតិ សាសនា ព្រះមហាក្សត្រ។
ព្រះតេជគុណ ហោ សុខុន បញ្ជាក់ថា ក្រោយពេលប្រមូលស្នាមមេដៃរយៈពេលពីរខែក្រោយ នឹងដាក់ទៅស្ថាប័នពាក់ព័ន្ធរួមមានក្រសួងមហាផ្ទៃ រដ្ឋសភា ខុទ្ទកាល័យលោកនាយករដ្ឋមន្ត្រីនិងស្ថាប័នព្រះបរមរាជវាំង ចំណែកតុលាការព្រះអង្គថា ជាជម្រើសចុងក្រោយ។
កាលពីចុងខែមិថុនា ប្រជាពលរដ្ឋម្នាក់រស់នៅរាជធានីភ្នំពេញ ឈ្មោះ សុច សឿង បានដាក់ពាក្យប្តឹងលោក ខឹម វាសនា ទៅសាលាដំបូងរាជធានីភ្នំពេញ ដោយចោទថា មេបក្សរូបនោះ បានជេរប្រមាថនិងមើលងាយពូជសាសន៍ខ្មែរ ហើយប្រើពាក្យអសុរសជាច្រើន ប៉ះពាល់ដល់កិត្តិយស សេចក្ដីថ្លៃថ្នូររបស់ប្រទេសជាតិ៕
