ក្រុមអង្គការសង្គមស៊ីវិលអំពាវនាវឲ្យសាលាឧទ្ធរណ៍ ទម្លាក់បទចោទលើសកម្មជនដីធ្លីដ៏លេចធ្លោម្នាក់ នៅតំបន់បឹងកក់គឺអ្នកស្រី ទេព វន្នី ដោយថា សាលក្រមផ្តន្ទាទោសរបស់សាលាដំបូងរាជធានីភ្នំពេញ កន្លងទៅថា «ជាចេតនានយោបាយ ប្រឆាំងនឹងសំឡងអ្នករិះគន់»។
ការអំពាវនាវរបស់ក្រុមអង្គការសង្គមស៊ីវិលនេះ ធ្វើឡើងចំពេលដែលអ្នកស្រី ទេព វន្នី ត្រូវចូលខ្លួនទៅការពារបណ្តឹងទាស់ នៅសាលាឧទ្ធរណ៍ នៅរសៀលថ្ងៃទី២៧ខែកក្កដានេះ ប្រឆាំងនឹងសាលក្រមតុលាការជាន់ទាប។
អ្នកស្រី ទេព វន្នី ត្រូវអាជ្ញាធររាជធានីចាប់ខ្លួនម្តងទៀត កាលពីថ្ងៃទី១៥ ខែសីហា ឆ្នាំ២០១៦ នៅពេលស្ត្រីរូបនោះចូលរួមធ្វើយុទ្ធនាការថ្ងៃចន្ទពណ៌ខ្មៅ ទាមទារឲ្យដោះលែងមន្ត្រីអាដហុក៤រូប និងមន្ត្រី គជប រួមទាំងជំរុញឲ្យរដ្ឋាភិបាលវែកមុខរកអ្នកនៅពីក្រោយការបាញ់សម្លាប់លោក កែម ឡី។
ប៉ុន្តែនៅថ្ងៃទី២៣ខែកុម្ភៈឆ្នាំ២០១៧ សាលាដំបូងរាជធានីភ្នំពេញ បានសើរើសំណុំរឿងចាស់កាលពីឆ្នាំ២០១៣ មកចោទប្រកាន់អ្នកស្រី ទេព វន្នី ពីបទប្រព្រឹត្តអំពើហិង្សាដោយចេតនា មានស្ថានទម្ងន់ទោស និងផ្តន្ទាទោសដាក់ពន្ធនាគារ២ឆ្នាំកន្លះ(៣០ខែ)ពិន័យប្រាក់៥លានរៀល និងបង្កាប់ឲ្យបង់ទៅដើមបណ្តឹងជាសន្តិខណ្ឌដូនពេញចំនួន៩លានរៀល។
សេចក្តីថ្លែងការណ៍រួម របស់អង្គការនិងសមាគម ចំនួន២៧ ចុះថ្ងៃទី២៦ខែកក្កដា បានចាត់ទុកថា សាលក្រមចោទប្រកាន់នោះ មិនបានផ្តល់យុត្តិធម៌ដល់អ្នកស្រី ទេព វន្នី ទេ ដោយថា សកម្មជនរូបនេះបានរងរបួសដោយការបង្ក្រាប ពីសំណាក់កងកម្លាំងសមត្ថកិច្ចរដ្ឋាភិបាល ជិតផ្ទះនាយករដ្ឋមន្ត្រី។
សេចក្តីថ្លែងការណ៍ដដែលលើកឡើងទៀតថា សវនាការនៅសាលាដំបូងមិនបានអនុឡោមតាមបទដ្ឋានអន្តរជាតិ ទាក់ទិននឹងសិទ្ធិទទួលបានការជំនុំជម្រះដោយស្មើភាពគ្នានោះទេ ដោយថាពុំមានភស្តុតាងជាក់លាក់ណាមួយ សម្រាប់បញ្ជាក់ពីបទចោទលើអ្នកស្រី ទេព វន្នី ឡើយ ហើយថា ក៏ពុំឃើញដើមបណ្តឹង ឬសាក្សីដាក់បន្ទុកបានផ្តល់សក្ខីកម្មផ្ទាល់មាត់ក្នុងសវនាកាទាំងពីរលើកនោះដែរ ។
ក្រុមអង្គការសង្គមស៊ីវិលចាត់ទុកថា ការចាប់ខ្លួន អ្នកស្រី ទេព វន្នី ថាទំនងជាហេតុផលនយោបាយ ក្នុងការប៉ុនប៉ងរឹតត្បិតសេរីភាពបញ្ចេញមតិសំឡេងអ្នកជំទាស់ ដោយថា អ្នកស្រី ទេព វន្នី ជាសកម្មជនដីធ្លី និងអ្នកការពារសិទ្ធិមនុស្ស។
អ្នកនាំពាក្យសាលាឧទ្ធរណ៍ លោក ទូច ថារិទ្ធិ សុំមិនធ្វើអត្ថាធិប្បាយករណីនេះទេ ដោយអះអាងថា លោកមិនទាន់បានមើលសេចក្តីថ្លែងការណ៍នេះនៅឡើយ។
លោកថា៖ «អាហ្នឹងទុកលទ្ធភាពឲ្យចៅក្រមនិងក្រុមប្រឹក្សាជំនុំជម្រះរបស់សាលាឧទ្ធរណ៍ដេញដោលទៅលើករណីហ្នឹងសិន មិនដឹងថាគាត់សម្រេចថាយ៉ាងម៉េចទៅលើករណីហ្នឹង ខ្ញុំមិនដឹងដែរបាទ»។
អ្នកស្រី ទេព វន្នី ត្រូវបានអាជ្ញាធរចាប់ខ្លួនដាក់ពន្ធនាគារ៣ដងមកហើយ នៅពេលដែលសកម្មជនដីធ្លីរូបនោះ ចូលរួមតវ៉ាប្រឆាំងនឹងការបណ្តេញ និងជំរុញឲ្យមានយុត្តិធម៌សង្គម។ ការដែលតុលាការបង្គាប់ឲ្យឃុំខ្លួន ជាលើកទី៣នេះ អ្នកស្រីទេព វន្នី បានរស់នៅក្នុងពន្ធជិតមួយឆ្នាំ គិតត្រឹមថ្ងៃទី២៧ខែកក្កដានេះ។
អ្នកស្រាវជ្រាវពីការអភិវឌ្ឍសង្គមនិងជាអ្នកតាមដានស្ថានការណ៍នយោបាយនៅកម្ពុជា លោក បណ្ឌិត មាន នី លើកឡើងថា ការចាប់ខ្លួនអ្នកស្រី ទេព វន្នី លោកថាអាចដោយសារដ្ឋាភិបាល មិនចង់ឲ្យមានការធ្វើយុទ្ធនាការថ្ងៃចន្ទពណ៌ខ្មៅ ដោយថាយុទ្ធនាការនោះ ប៉ះពាល់ដល់មុខមាត់រដ្ឋាភិបាល ករណីចាប់ឃុំខ្លួនមន្ត្រីសង្គមស៊ីវិល នាពេលកន្លងទៅ។
លោក មាស នី យល់ថា បើមានការទម្លាក់បទចោទលើ អ្នកស្រី ទេព វន្នី លោកថា អាចជា ការជួយលើកមុខមាត់រដ្ឋាភិបាលឡើងវិញ។
លោកថា៖ «ខ្ញុំគិតថាបើទោះបីខ្ញុំមិននិយាយ ក៏ក្រសួងយុត្តិធម៌ក៏បានបាននិយាយនៅពេលថ្មីៗនេះហើយដែរ ថាប្រព័ន្ធយុត្តិធម៌មានបញ្ហាច្រើនដែលត្រូវកែតម្រូវ។ អញ្ចឹងរឿងទាំងអស់ដែលយើងធ្លាប់ឃើញកន្លងមកហើយនេះគឺសុទ្ធតែបានបង្ហាញពីភាពស្រពិចស្រពិល ទៅលើឯករាជ្យភាព របស់ប្រព័ន្ធតុលាការ»។
ទោះជាយ៉ាងណា ក្រុមអង្គការសង្គមស៊ីវិល អះអាងថា ការតវ៉ាដោយសន្តិវិធីនិងសេរីភាពបញ្ចេញមតិមិនមែនជាបទល្មើនោះទេ និងថាអ្នកការពារសិទ្ធិមនុស្សមិនត្រូវបានដាក់ទោសដោយសារតែអនុវត្តសិទ្ធិភាពមូលដ្ឋានដោយសន្តិវិធីនោះឡើយ៕
