គណបក្សប្រជាធិបតេយ្យមូលដ្ឋាន(GDP)បានស្នើឲ្យរដ្ឋាភិបាលបន្ធូរបន្ថយបរិយាកាសនយោបាយឲ្យល្អឡើងវិញ ដើម្បីឈានទៅរកការបោះឆ្នោតខាងមុខ គ្មានការគាបសង្កត់ និងវាយប្រហារលើបក្សនយោបាយផ្សេងៗ។
នៅក្នុងសន្និសីទសារព័ត៌នៅសមាជជាតិលើកទីមួយរបស់គណបក្សប្រជាធិបតេយ្យមូលដ្ឋាននាថ្ងៃទី ២៧ ខែ សីហានេះ ប្រធានគណបក្សលោក យ៉េង វិរៈ សម្ដែងការព្រួយបារម្ភ សម្រាប់បរិយាកាសនយោបាយមុនការបោះឆ្នោតជ្រើសតាំងតំណាងរាស្ត្រ ដោយថាជាបរិយាកាសនយោបាយនេះមិនល្អ ប៉ះពាល់ដល់សិទ្ធិសេរីភាពរបស់ពលរដ្ឋក្នុងការទទួលបានព័ត៌មានពិត។
លោកយ៉េង វិរៈ លើកឡើងថា៖ « បរិយាកាសនយោបាយបែបនេះដែលយើងព្រួយបារម្ភ និងសំនូមពរទាមទារឲ្យរដ្ឋាភិបាលបន្ធូរបន្ថយបរិយាការនេះឲ្យល្អសម្រាប់ការបោះឆ្នោតខាងមុខ»។
ឆ្លើយតបទៅនឹងការលើកឡើងបែបនេះអ្នកនាំពាក្យគណកបក្សកាន់អំណាច លោក សុខ ឥសាន មានប្រសាសន៍ថា ស្ថានភាពបច្ចុប្បន្នមិនមានការរឹតត្បិតនោះទេ មានតែការ ពង្រឹង ការអនុវត្តច្បាប់នៅក្នុងប្រទេស ។ លោកថាការស្នើសុំយ៉ាងណា ដែលផ្ទុយនឹងគោលការណ៍ នៃច្បាប់មិនអាចទៅរួចទេ។
លោក សុខ ឥសាន បន្ថែមថា បើគណបក្សនយោបាយ ណាដែលយល់ ថាបរិយាកាស នៃការបោះឆ្នោតខាងមុខ មិនត្រឹមត្រូវ និងអយុត្តិធម៌ កុំចូលរួមប្រកួតប្រជែង ព្រោះលោកថា មាន គណបក្សនយោបាយច្រើនចូលរួមប្រកួតប្រជែងហើយ។
ស្ថានភាពនយោបាយបច្ចុប្បន្នរងការចោទប្រកាន់ពីសហគមន៍ជាតិ និង អន្តរជាតិថា មានសភាពមិនល្អបន្ទាប់ពីមានការបិទអង្គការអន្តរជាតិ NDI ព្រមានបិទកាសែត Cambodia Daily ការបិទស្ថានីយវិទ្យុក្នុងស្រុកមួយចំនួន ដែលផ្សាយបន្តផ្ទាល់ពីសារព័ត៌មានប្រជាធិបតេយ្យឯករាជ្យ VOD និងសារព័ត៌មានបរទេសផ្សាយជាភាសាខ្មែរ RFA និង VOA។