មានការភ្ញាក់ផ្អើលយ៉ាងខ្លាំង បន្ទាប់ពីមានការហេតុការបាញ់ប្រហារបណ្ដាលឲ្យស្លាប់ទាំងពីរនាក់ប្ដីប្រពន្ធនៅ សង្កាត់បឹងទំពុន ក្នុងខ័ណ្ឌមានជ័យ ដោយជនរងគ្រោះ និងជនបង្កហេតុ គឺជាបងប្រុសបង្កើត និងជាបងថ្លៃរបស់ពិធីការិនី ខៀវ សានសាណា។ នេះ ជាឃាតកម្ម ដែលត្រូវបានសមត្ថកិច្ចបញ្ជាក់ជាព័ត៌មានបឋមថា ផ្ទុះការបាញ់ប្រហារ ដោយសារតែខាងប្រុស គឺបងប្រុសអ្នកនាង ខៀវ សានសាណា ប្រច័ណ្ឌភរិយា ហើយដោយមានជម្លោះជាមួយនឹងគ្នាខ្លាំងៗផង ក៏បាញ់សម្លាប់ភរិយានៅនឹងកន្លែងតែម្ដង។
សមត្ថកិច្ចបន្តថា ក្រោយការបាញ់ប្រហារបណ្ដាលឲ្យភរិយាស្លាប់ បងប្រុសរបស់អ្នកនាង ខៀវ សានសាណា ក៏បាញ់សម្លាប់ខ្លួនឯងតែភ្លាមៗ បណ្ដាលឲ្យស្លាប់នៅនឹងកន្លែង ចំណែកភរិយាត្រូវគេសង្ស័យថា នៅមានដង្ហើមហើយបានដឹកទៅសង្គ្រោះបន្ទាន់នៅមន្ទីរពេទ្យ ហើយបានស្លាប់នៅតាមផ្លូវ។
នេះជាហេតុការណ៍ឃាតកម្មមួយ ដែលធ្វើអោយផ្អើលយ៉ាងកក្រើកហ្វេសប៊ុក កាលពីយប់ថ្ងៃទី២៧សីហា ដែលព័ត៌មានបឋមថា កើតឡើងដោយហេតុផលនៃភ្លើងប្រច័ណ្ឌ និងជម្លោះដែលនាំឲ្យបងប្រុសអ្នកនាង ខៀវ សានសាណា ឈានទៅបង្កឃាតកម្ម និងធ្វើអត្តឃាតនោះ។ ប៉ុន្តែ នៅមិនទាន់មានការបញ្ជាក់លម្អិតនៅឡើយទេ។
លោក ហួរ ម៉េងវ៉ា អធិការរងខ័ណ្ឌមានជ័យ បានថ្លែងប្រាប់បណ្ដាញសារព័ត៌មានថា ហេតុការណ៍ ដែលនាំមានឃាតកម្មបាញ់សម្លាប់ប្រពន្ធនោះ គឺបណ្ដាលមកពីលោក ខៀវ កូនែល ជាកូនប្រុសរបស់លោក ខៀវ កូឡា និងត្រូវជាបងប្រុសរបស់អ្នកនាង ខៀវ សានសាណា ផ្ទុះភ្លើងប្រច័ណ្ឌ ហើយបណ្ដាលឲ្យមានជំលោះធ្ងន់ធ្ងរ។
ហេតុការណ៍នោះ លោកថា បានកើតមានឡើងនៅក្បែរបុរី៩៩៩ នៅក្នុងសង្កាត់បឹងទំពុន តែចំពោះករណីថា តើមុនមានការបាញ់ប្រហារ តើប្ដីប្រពន្ធមួយគូនេះ ឈ្លោះគ្នាព្រោះតែប្រច័ណ្ឌរឿងអី លោកថា មិនទាន់អាចបញ្ជាក់បានទេ។ លោកថា ផ្អែកតាមអង្គហេតុ គឺលោក ខៀវ កូនែល បានបាញ់សម្លាប់ប្រពន្ធ តែប្រពន្ធនៅមិនទាន់បានស្លាប់ភ្លាមៗនោះទេ គឺបានស្លាប់នៅតាមផ្លូវ ពេលដឹកទៅសង្គ្រោះនៅឯមន្ទីរពេទ្យ។
ដោយឡែកសម្រាប់ លោក ខៀវ កូនែល លោក ហួរ ម៉េងវ៉ា មានប្រសាសន៍ថា ក្រោយពីបាញ់សម្លាប់ភរិយា ក៏បាញ់ខ្លួនឯង នៅចំកន្លែងសំខាន់បណ្ដាលឲ្យស្លាប់នៅនឹងកន្លែង។ សពទាំង២នាក់ប្ដីប្រពន្ធ ត្រូវបានដឹកមកតម្កល់ទុកក្នុងផ្ទះ ដែលជាកន្លែងកើតហេតុ ដោយភ្លាមៗ បន្ទាប់ពីដឹកសពភរិយាមកតម្កល់ក្នុងផ្ទះ គឺក្រុមសមត្ថកិច្ចបានបិទទ្វារផ្ទះ មិនឲ្យមានការចូលថតនោះទេ។
គួរបញ្ជាក់ថា លោកថា លោក ខៀវ កូនែល គឺជាក្មួយបង្កើតរបស់នាយឧត្តមសេនីយ៍ ខៀវ សុភ័គ ដែលជាអ្នកនាំពាក្យប្រចាំក្រសួងមហាផ្ទៃ ដោយលោកមុនស្លាប់គឺមានតួនាទីជាអនុប្រធានការិយាល័យគណនេយ្យ និងជាជំនួយការផ្ទាល់របស់លោក ឧត្តមសេនីយ៍ ជួន សុវណ្ណ ស្នងការនគរបាលរាជធានីភ្នំពេញ។ មកទល់ពេលនេះ ដំណឹងមរណភាពរបស់បងប្រុស និងបងថ្លៃ អ្នកនាង ខៀវ សានសាណា បានក្លាយជាប្រធានបទក្ដៅយ៉ាងខ្លាំង នៅតាមបណ្តាញសង្គមហ្វេសប៊ុក៕
