អតីតប្រធានគណបក្សប្រឆាំង ដែលកំពុងនិរទេសខ្លួននៅក្រៅប្រទេស បានអំពាវនាវឲ្យប្រជាពលរដ្ឋមានអាយុគ្រប់បោះឆ្នោត ហើយមិនទាន់មានឈ្មោះ ឲ្យទៅបំពេញបែបបទចុះឈ្មោះ ដើម្បីទទួលបានសិទ្ធិបោះឆ្នោតជ្រើសតាំងតំណាងរាស្ត្រនៅឆ្នាំក្រោយនេះ។
លោក សម រង្ស៊ី ថ្លែងតាមវីឌីអូខ្លីបក្នុងហ្វេសប៊ុករបស់លោកថា កិច្ចការចំពោះមុខ ដែលពលរដ្ឋមិនមានឈ្មោះបោះឆ្នោតត្រូវធ្វើពេលនេះ គឺត្រូវទៅចុះឈ្មោះបោះឆ្នោតឲ្យបានតាមការកំណត់របស់គណៈកម្មាធិការជាតិរៀបចំការបោះឆ្នោតបានប្រកាស។
តាមរបាយការណ៍របស់គណៈកម្មាធិការជាតិរៀបចំការបោះឆ្នោតគឺមានប្រជាពលរដ្ឋគ្រប់អាយុហើយមិនទាន់មានឈ្មោះបោះឆ្នោតមានប្រមាណ១លាន៥សែននាក់។ ចំណែកការចុះឈ្មោះបោះឆ្នោតនៅឆ្នាំនេះគឺចាប់ផ្តើមពីថ្ងៃទី១ខែកញ្ញា ដល់ថ្ងៃទី៩ខែវិច្ឆិកា។