អាជ្ញាធរអាមេរិកបានចោទប្រកាន់និងដាក់ទណ្ឌកម្មសេដ្ឋកិច្ចទៅលើស្ត្រីជាពាណិជ្ជករចិនម្នាក់និងដៃគូពាណិជ្ជកម្មជាច្រើនរបស់គាត់ បន្ទាប់ពីមានការចោទប្រកាន់ថាពាណិជ្ជករចិនរូបនោះបានជួយដល់ក្រុមហ៊ុនជាប់បញ្ជីខ្មៅរបស់កូរ៉េជើងមួយឲ្យគេចផុតពីទណ្ឌកម្ម ជុំវិញតួនាទីរបស់ក្រុមហ៊ុននោះនៅក្នុងកម្មវិធីផលិតអាវុធនុយក្លេអ៊ែររបស់ក្រុងព្យុងយ៉ាង។
យោងតាមកាសែត Wall Street Journal បានឲ្យដឹងថា អ្នកស្រី ម៉ា សៀវហុង ដែលជាសមាជិកបក្សកុម្មុយនីស្តចិនផងនោះនិងក្រុមហ៊ុន Dandong Hongxian Industrial Development របស់គាត់ត្រូវបានអាជ្ញាធរអាមេរិកចោទប្រកាន់ថាបានដើរតួជាបណ្ដាញហិរញ្ញវត្ថុសម្រាប់ក្រុមហ៊ុន Korea Kwangson Banking Corporation ដែលជាធនាគាររបស់កូរ៉េខាងជើង។
Dandong Hongxiang ដែលជាក្រុមហ៊ុនលក់ដុំគ្រឿងចក្រនិងសម្ភារៈឧស្សាហកម្មនោះ ត្រូវបានគេជឿថាបានដំណើរការផ្ទេរប្រាក់ដុល្លារនៅចន្លោះឆ្នាំ២០០៩ដល់ឆ្នាំ២០១៥ តាមរយៈប្រព័ន្ធហិរញ្ញវត្ថុអាមេរិកជំនួសឲ្យក្រុមហ៊ុន Korea Kwangson។
ក្រុមហ៊ុនកូរ៉េខាងជើងមួយនេះត្រូវបានអាមេរិកនិងអង្គការសហប្រជាជាតិដាក់ចូលក្នុងបញ្ជីខ្មៅដោយសារបានជួយឧបត្ថម្ភដល់កម្មវិធីនុយក្លេអ៊ែររបស់កូរ៉េខាងជើង៕
