រញ្ជួយដីក្នុងកម្លាំងខ្លាំងមួយនៅក្នុងភាគកណ្តាលនៃប្រទេសអ៊ីតាលីកាលពីថ្ងៃពុធម្សិលមិញ បានធ្វើឲ្យពលរដ្ឋមានការព្រួយបារម្ភខ្លាចមានការស្លាប់ច្រើនដូចកាលពីរញ្ជួយកាលពីខែសីហា ប៉ុន្តែរបាយការណ៍បឋមគឺមិនមានអ្នកស្លាប់ដោយសារការរញ្ជួយដីកាលពីម្សិលមិញនោះទេ។
របាយការណ៍សមត្ថកិច្ចបានបញ្ជាក់ថា មានពលរដ្ឋមួយចំនួនរងរបួស។ ការរញ្ជួយបានកើតឡើង៣កន្លែង ក្នុងរយៈពេលប្រមាណ២ម៉ោង ហើយបានបណ្តាលឲ្យបាក់រលំនិងខូចខាតរដ្ឋារចនាសម្ព័ន្ធជាច្រើនកន្លែងដែលក្នុងនោះរួមទាំងការបាក់បែកព្រះវិហារគ្រិស្តផងដែរ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
ក្រុមអ្នកភូមិសាស្ត្រអាមេរិកបានរកឃើញថា ការញ្ជួយលើកទី១មានកម្លាំង៥,៤រិច្ឆទ័រ ទី២កម្លាំងរញ្ជួយ៦,១រិច្ឆទ័រ និងទី៣កម្លាំងរញ្ជួយ៤,៩រិច្ឆទ័រ។
ក្រោយការរញ្ជួយបាន៥ម៉ោង ប្រធាននាយកដ្ឋានការពារជនស៊ីវិលលោក Fabrizio Curcio ថ្លែងថា មនុស្សជាង១០នាក់បានរងរបួស ប៉ុន្តែមិនប៉ះពាល់ធ្ងន់ធ្ងរនោះទេនិងមិនគំរាមកំហែងដល់ជីវិតមនុស្សទេ។
ការរញ្ជួយដីនៅអ៊ីតាលីកាលពីថ្ងៃទី២៤ ខែសីហា ឆ្នាំ២០១៦ នៅក្នុងតំបន់ Marche, Lazio និង Umbria បានប៉ះដល់ទីក្រុងជាច្រើនហើយបានបណ្តាលឲ្យមនុស្សជិត៣០០នាក់ស្លាប់៕
