ខុសពីការប្រកួតមុនៗ ដែលបានធ្វើឡើងនៅក្នុងកម្មវិធីប្រកួតជ្រើសរើសជើងឯករបស់ប៉ុស្ដិ៍លេខ៥ ការប្រកួតរវាងកីឡាករកម្ពុជា២រូប គឺសៅ វណ្ណា និងកីឡាករជាគូប្រកួត កីឡាកររូបនេះត្រូវគេឃើញមានរបួសបែករយះហូរឈាមដូចស្រោចទឹកពីលើមុខ ដោយខាងគ្រូពេទ្យបារម្ភខ្លាចប៉ះពាល់ដល់សុខភាពរបស់កីឡាកររូបនេះនោះផង។
យ៉ាងណាមិញនៅក្រោយបញ្ចប់ការប្រកួតកីឡាកររូបនេះនៅតែធ្វើបានល្អ ដោយឈ្នះលើគូប្រកួតដែលជាជើងខ្លាំងម្នាក់ ហើយបានឡើងអង្គុយលើកៅអីក្នុងវគ្គ៨នាក់ ដែលជាវគ្គសំខាន់មួយដើម្បីបានបន្តទៅកាន់វគ្គពាក់កណ្ដាលផ្ដាច់ព្រ័ត្របើនៅតែឈ្នះការប្រកួតសម្រាប់មួយលើកក្រោយ។ ការប្រកួតដែលបានធ្វើឡើងនៅសង្វៀនទូរទស្សន៍ប៉ុស្ដិ៍លេខ៥ព្រែកកំពិស កាលពីល្ងាចថ្ងៃទី២៥ វិច្ឆិកា នោះការប្រកួតដណ្ដើមជើងឯកប៉ុស្ដិ៍លេខ៥ដែលបានធ្វើឡើងហើយទទួលបានការចាប់អារម្មណ៍យ៉ាងខ្លាំង ដោយសារតែកីឡាករក្នុងប្រភេទទម្ងន់៦៥គីឡូក្រាមមកពីទូទាំងប្រទេសរហូតដល់៣២នាក់ ដែលមានទាំងកីឡាករល្បីៗជើងចាស់និងកំពុងឡើងកូដថ្មីៗផង ត្រូវអោយគេប្រមូលផ្ដុំគ្នាមកប្រកួតគ្នាចាញ់ធ្លាក់ៗ។
ការប្រកួតត្រូវបានតម្រូវអោយប្រកួតជម្រុះតាំងពី៣២នាក់យក១៦នាក់ និងបន្តពី១៦នាក់យក៨នាក់ ដោយការប្រកួតដែលបានធ្វើឡើងកាលពីថ្ងៃទី២៥ វិច្ឆិកាគឺការប្រកួតវគ្គចុងក្រោយរបស់អ្នកឈ្នះនៅវគ្គ១៦នាក់ ដើម្បីយក៨នាក់។
កីឡាករ២រូបគឺ សៅ វណ្ណា និងកីឡាករ ពុយ វណ្ណៈ គឺជាអ្នកបានឡើងអង្គុយក្នុងវគ្គ៨នាក់នោះដោយអ្នកទាំងពីទទួលបានឱកាសឈាន ឡើងដោយសារតែបានប្រកួតឈ្នះអ្នកដូចគ្នាក្នុងវគ្គ១៦នាក់។ យ៉ាងណាមិញ
ក្នុងចំណោមជ័យជម្នះរបស់កីឡាករទាំងពីរគឺមានតែជ័យជម្នះរបស់កីឡាករ សៅ វណ្ណា បង្គោលខៀវដែលជាគូប្រកួតជម្រើសជើងឯកទី១ប៉ុណ្ណោះដែលមានអ្នកទស្សនាផ្ដោតការចាប់អារម្មណ៍ខ្លាំងក្លាជាងគេ ដោយសារតែគេគ្រាន់តែបើកឆាកប្រកួតភ្លាមក៏ត្រូវគូប្រកួតវាយនឹងកែងអោយរយៈលើផ្ទៃមុខតែម្ដង ហើយដោយសារតែស្នាមរយះនោះត្រូវចំសរសៃឈាម ទើបមានឈាមហូរឥតឈប់ធ្វើអោយផ្ទៃមុខរបស់គេបើទោះជាត្រូវគ្រូពេទ្យ
និងលោកអាជ្ញាកណ្ដាលជួយជូតដដែលៗក៏នៅតែមានឈាមហូរដាមផ្ទៃមុខមិនឈប់។
កីឡាករ សៅ វណ្ណា ត្រូវគេឃើញមិនបោះបង់ក្ដីស្រម៉ៃដើម្បីបានឡើងទៅវគ្គ៨នាក់នោះទេ ដោយសារតែគេប្រឹងប្រែងប្រកួតគ្នាជាមួយគូប្រកួតយ៉ាងស្វិតស្វាញមិនព្រមឈប់នោះទេ បើទោះជាសភាពហូរឈាមរបស់គេ អាចបណ្ដាលអោយគេខ្សោះឈាមនិងវិលមុខនៅក្នុងពេលប្រកួត។ កីឡាករបង្គោលខៀវរូបនេះកាន់តែស្ទុះវាយចូល
ដោយមិនបាក់ស្មារតីនេះទេ ហើយទំនងជាការវាយលុករបស់គេកាន់តែមានភាពរឹងមាំអមដោយមានឈាមហូរស្រោចមុខផង ទើបធ្វើអោយកីឡាករម្ខាងទៀតបែរជាភ័យរន្ធត់ទៅវិញ ហើយធ្វើអោយឱកាសវាយត្រូវរបស់កីឡាករ សៅ វណ្ណា កាន់តែកើតមានឡើងក្នុងទឹកទី៣។
កីឡាករ សៅ វណ្ណា បានក្លាយជាអ្នកឈ្នះនៅវគ្គចុងក្រោយយ៉ាងមោទនភាព ដោយម្នាក់ដែលបានទស្សនាការប្រកួតមួយនេះ សុទ្ធតែបានសរសើរថានេះជាជោគជ័យដ៏កម្រ បើទោះជាទម្រាំបានឈ្នះគឺស្ទើរតែធ្វើអោយកីឡាករ សៅ វណ្ណា លះបង់សុវត្ថិភាពផ្ទាល់ខ្លួនក្នុងការវាយលុក ក្នុងពេលដែលសភាពហូរឈាមរបស់គេក៏មានសភាពខ្លាំង តែគេនៅតែតស៊ូបាន។ ការប្រកួតរបស់គេជាមួយនឹងកីឡាករ វុត្ថា ប៊ុនឃាង បានបង្ហាញអោយឃើញនូវភាពក្លាហាន និងការតស៊ូយ៉ាងស្វិតស្វាញរបស់គេ ដោយសារតែ សៅ វណ្ណា ដ្បិតថាមានរហួសធ្ងន់ធ្ងរប៉ុន្តែនៅតែបានប្រឹងប្រែងរហូតធ្វើអោយកីឡាករជាគូភាគីជាស្លុតស្មាតីទៅវិញ ហើយផ្ដល់ឱកាសអោយគេបានក្លាយជាអ្នកមានប្រៀប។
អ្នកទស្សនាភាគច្រើនសុទ្ធតែមានការរន្ធត់ចិត្ត បន្ទាប់ពីឃើញកីឡាករ សៅ វណ្ណា បែករយះដល់ថ្នាក់ហូរឈាមដល់ម្លឹងប៉ុន្តែគេនៅតែមិនព្រមចុះញ៉ម ហើយប្រឹងយកជ័យជម្នះឈានទៅវគ្គ៨នាក់។ លោក សេង កដិកា អ្នករៀបចំការប្រកួតប្រចាំទូរទស្សន៍ប៉ុស្ដិ៍លេខ៥បញ្ជាក់ថា ជ័យជម្នះរបស់កីឡាករ សៅ វណ្ណា បានបង្ហាញអោយឃើញពីភាពស្វិតស្វាញរបស់កីឡាករ ដែលស្រេកឃ្លានជ័យជម្នះដែលលោកចង់បាន។
លោកថាក្នុងពេលដែលគេមិនព្រមបញ្ឈប់ការប្រកួតដោយសារតែមានឈាមច្រើន លោកភ័យរឿងគេវិលមុខ ប៉ុន្តែនៅពេលដែលគេទប់ជំហរបានល្អ ហើយកាន់តែធ្វើការវាយមុខបានល្អ ទើបលោកយល់ថាមិនមានបញ្ហា
ហើយកីឡាករដែលទទួលបរាជ័យ លោកថាអាចបណ្ដាលមកពីគេស្លុតនឹងឈាមនោះទៅវិញ។
លោកថាកីឡាករ សៅ វណ្ណា ក្រៅពីខ្លាំងក្នុងការតស៊ូ គឺអាចទប់ស្មារតីបានល្អ ទើបធ្វើអោយគេទទួលបានជ័យជម្នះនៅវគ្គចុងក្រោយ។ លោកថា កីឡាករ សៅ វណ្ណា ទទួលបានជោគជ័យគួរជាទីមោទនៈ ហើយក្រោយពីមានឱកាសឈានឡើងទៅវគ្គ៨នាក់ គេនឹងត្រូវបន្តឡើងប្រកួតជាមួយអ្នកឈ្នះ និងអ្នកឈ្នះបន្តទៀត ដើម្បីជម្រុះយកតែ៤នាក់ ដែលជាវគ្គកាន់តែសំខាន់ឆ្ពោះទៅរកតំណែងជើងឯកនិងប្រាក់លាន។ លោកថា កីឡាករទាំង៨ដែលទើបជម្រុះបាន ជាពិសេសគឺ សៅ វណ្ណា សុទ្ធតែមានឱកាសបានក្លាយជាម្ចាស់ពាន និងប្រាក់លាននៅវគ្គចុងក្រោយ ប្រសិនបើម្នាក់ក្នុងចំណោមពួកគេ នៅតែរក្សាជំហរហ្វឹកហាត់ និងវាយលុកបានល្អហើយបន្តឈ្នះដោយមិនចាញ់។
លោកថាការប្រកួតមួយនេះ មិនភ័យរឿងកីឡាករណាមួយលក់ដូរលទ្ធផលដូចការប្រកួតជើងឯកដែលប្រើរូបមន្តផ្សេងនោះទេ ទើបការប្រកួតរវាងកីឡាករ សៅ វណ្ណា និងកីឡាករជាគូប្រកួត គឺកីឡាករ សៅ វណ្ណា បានឈ្នះពិន្ទុ ហើយឈានឡើងទៅវគ្គ៨នាក់ បើទោះជាត្រូវមានរបួសហូរឈាមដូចគេស្រោចមុខដែលមិនខុសពីប្ដូរ
ជីវិតយកឈ្នះ៕