បើទោះជាបានស្នើសុំមន្ត្រីតុលាការទៅបំភ្លឺនៅថ្ងៃទី២៩ វិច្ឆិកា ជំនួសអោយការកោះហៅកាលពីថ្ងៃទី២២ វិច្ឆិកា ក៏តារាសម្ដែងកញ្ញា នី មុន្នីនាថ នៅតែមានជំនឿថាខ្លួននឹងឈ្នះក្ដី ដោយនាងបានអះអាងតាមរយៈមេធាវី
ថានឹងរៀបចំបណ្ដឹងប្ដឹងតបនោះផង ប្រសិនបើនាងឈ្នះក្ដីជាមួយអតីតគូដណ្ដឹង។ យ៉ាងណាមិញ ផ្ទុយពីជំនឿចិត្តរបស់នាង និងមេធាវី ភាគីខាងដើមបណ្ដឹងឯណោះវិញ ក៏ច្បាស់ក្នុងចិត្តដូចគ្នាផងដែរ ដោយសារតែលោកប្រកាសថាមុនឈានដល់ការដាក់បណ្ដឹងលោកក៏មានភស្ដុតាងគ្រប់គ្រាន់មិនខុសគ្នា។
កញ្ញា នី មុន្នីនាថ នៅតែបានប្រកាសថានាងមិនខ្លាចដើមបណ្ដឹងដែលបានដាក់បណ្ដឹងប្ដឹងនាងពីបទឆបោក និងរំលោភលើសេចក្ដីទុកចិត្ត ដោយទាមទារអោយសងប្រាក់ និងបង់សំណងសរុបចំនួន១២ម៉ឺនដុល្លារនោះទេ
ដោយសារតែនាងប្រកាសថាមិនធ្លាប់ទទួលបានទឹកប្រាក់ឧបត្ថម្ភដល់កម្រិតបែបហ្នឹង ដូចអ្វីដែលបានដាក់បន្ទុកនៅក្នុងបណ្ដឹង។ នាងបញ្ជាក់ដដែលជាដដែលថា អតីតគូដណ្ដឹងរបស់នាងគឺ លោក អ៊ឹង សូឡាង អណិកជននៅអាមេរិកដែលបានដាក់ក្នុងបណ្ដឹងថានាងបានបោកលុយ៧ម៉ឺនដុល្លារ គឺទំនងជាលោកគិតទាំងថ្លៃជិះយន្តហោះ ថ្លៃចូលបន្ទប់ទឹក និងថ្លៃអោយធីបអ្នករត់តុ ក្នុងពេលដែលលោកចុះមកស្រុកខ្មែរហើយមកជួបនាងក្នុងរយៈពេលស្រឡាញ់គ្នា ទើបធ្វើអោយទឹកប្រាក់ដែលលោកបានជះមកលើនាងឈានដល់រាប់ម៉ឺនដុល្លារ។
នាងថារយៈពេល៤ឆ្នាំដែលមិនទាន់ផ្ដាច់ពាក្យ លោកអ៊ឹង សូឡាង ពិតជាធ្លាប់បានអោយរបស់របរមានតម្លៃ និងលុយកាក់ខ្លះៗមែន ប៉ុន្តែមិនមែនជាទឹកប្រាក់ដល់៧ម៉ឺនដុល្លារដូចក្នុងបណ្ដឹងនោះទេ ទើបនាងមិនខ្លាចក្នុងការតតាំង។ ក្នុងនោះនាងក៏បានប្រកាសថាក្នុងពេលស្រឡាញ់ គឺលោកក៏ធ្លាប់យកលុយពីនាងខ្លះៗមិនខុសគ្នាផងដែរ គឺមិនមែនទៅណាមកណានាងយកតែលុយរបស់អតីតគូស្នេហ៍នោះទេ។
នាងថាខ្លួនមានភស្ដុតាង បង្ហាញថាមិនបានពាក់ព័ន្ធនឹងលុយកាក់ដល់៧ម៉ឺនដុល្លារដូចការចោទប្រកាន់ នោះទេ ហើយនាងក៏សម្ដែងការហួសចិត្តណស់ដែរ ដែលមនុស្សពីរនាក់ស្រឡាញ់គ្នាអោយគ្នាទៅវិញទៅមក លុះពេលបែកគ្នា បែរជាដាក់ក្នុងបណ្ដឹងថាបោក។
ស្រង់សម្ដីនាពេលនោះនាងនិយាយថា «ដើរសួរមនុស្សស្រឡាញ់គ្រប់គ្នាមើល ថាពេលស្រឡាញ់យើងអោយអ្វីគ្នា លុះដល់ពេលឈប់ស្រឡាញ់គ្នាទៅចោទគ្នាថាបោកចឹងទេ តើខ្ញុំបោកគាត់ពីអង្កាល់ ហើយបានអ្វីខ្លះ ខ្ញុំអត់ដែលបានលុយគាត់ដល់ថ្នាក់៧-៨ម៉ឺនដុល្លារហ្នឹងទេ!»។
នាងនៅអះអាងថាមិនភ័យពីការដាក់បណ្ដឹងនោះទេ ដោយសារតែអ្វីដែលបានអះអាងក្នុងពាក្យបណ្ដឹងរបស់អតីតគូដណ្ដឹងគឺមិនមែនជាការពិត។ មិនខុសពីការអះអាងរបស់ នី មុន្នីនាថ ដែលជាចុងបណ្ដឹង លោក រ៉ូ ប៊ីនណៃ មេធាវីការពារក្ដីរបស់នាង ក៏អះអាងថាមានជំនឿចិត្តលើភស្ដុតាងការពារខ្លួនរបស់កូនក្ដីខ្លួននោះដែរ។
លោកថាកញ្ញា នី មុន្នីនាថ មិនបានទទួលលុយរហូតដល់៧ម៉ឺនដុល្លារដូចអ្វីដែលបានអះអាងក្នុងបណ្ដឹងរបស់លោក អ៊ឹង សូឡាង ដែលជាអតីតគូដណ្ដឹងនោះទេ ដោយលោកបានទទួលភស្ដុតាងពីកូនក្ដីរបស់លោកដែលបញ្ជាក់ថានាងជានារីស្អាតស្អំនោះផង។ លោកថាការចូលបំភ្លឺនៅថ្ងៃទី២៩ វិច្ឆិកា លោក និងកូនក្ដីទៅបញ្ជាក់ក្នុងសភាពដែលមានជំនឿចិត្តក្នុងខ្លួន ដើម្បីទៅបង្ហាញភស្ដុតាងដល់តុលាការអោយដឹងពីភាពស្អាតស្អំរបស់កូនក្ដីលោក។
លោក និងកូនក្ដីក៏ប្រកាសប្ដឹងបកទាមទាជំងឺចិត្តពីលោក អ៊ឹង សូឡាង វិញនោះដែរ ដោយសារតែក្រោយការទម្លាយពីបណ្ដឹងរបស់លោក អ៊ឹង សូឡាង គឺបានធ្វើអោយប៉ះពាក់ដល់កិត្តិយស និងជីវភាពប្រចាំថ្ងៃរបស់នាង
ដែលជាតារាសម្ដែងម្នាក់។
លោកនិយាយថា «កូនក្ដីរបស់ខ្ញុំមានតែរងភាពអាម៉ាសនិងក្លាយជាមេម៉ាយខាន់ស្លាទៅវិញចំពោះបណ្ដឹងនេះព្រោះបានធ្វើអោយប៉ះពាល់ដល់ជីវភាពប្រចាំថ្ងៃ ក៏ដូចជាកេរ្តិ៍ឈ្មោះរបស់គាត់(នី មុន្នីនាថ)នៅក្នុងសង្គម!»។
យោងតាមការបញ្ជាក់របស់លោក កញ្ញា នីមុន្នីនាថ នឹងមានសិទ្ធិប្ដឹងតបយ៉ាងពេញទំហឹងជំវិញការបកអាក្រាតរបស់អតីតគូដណ្ដឹង ដោយសារតែការទម្លាយរបស់លោកលោក អ៊ឹង សូឡាង បានធ្វើអោយនាងរងភាពអាម៉ាស និងមានការប៉ះពាល់ដល់ការងារសម្ដែងប្រចាំថ្ងៃ ដោយសារតែការក្នុងបណ្ដឹងថានាងឆបោក មានការប៉ះពាល់ធ្ងន់ធ្ងរ។
លោកថាអោយតែកូនក្ដីរបស់នាងទទួលបានជ័យជម្នះក្នុងរឿងបណ្ដឹងជាមួយលោក អ៊ឹង សូឡាង នោះការប្ដឹងតបតនឹងកើតមានឡើង ដើម្បីជាការប៉ះប៉ូវចំពោះផលខូចខាតដែលកូនក្ដីរបស់លោកបានជួបក្រោយ
ពីមានបណ្ដឹងនេះឡើង។
លោកបានទាំងលើកឡើងថាក្រោយរងភាពអាម៉ាសនេះ កញ្ញា នី មុន្នីនាថ បានបាត់បង់ការងារសម្ដែង និងថតស្ពតមួយចំនួនព្រោះតែការលើកឡើងក្នុងបន្ដឹងធ្វើអោយបាត់ទំនុកចិត្តរបស់ម្ចាស់ក្រុមហ៊ុនដែលចង់ទាក់ទងកូនក្ដីរបស់នាងនោះផង។ យ៉ាងណាក៏ដោយ សម្រាប់តារាសម្ដែងកញ្ញា នី មុន្នីនាថ ធ្លាប់បានបង្ហាញជំហរថា
មិនចង់ប្ដឹងផ្ដល់តបតនោះទេ សំខាន់អោយតែរឿងរ៉ាវប្ដឹងផ្ដល់របស់លោក អ៊ឹង សូឡាង ត្រូវបញ្ចប់ដោយសន្តិវិធី។
ងាកទៅលោក អ៊ឹង សូឡាង ឯណោះវិញ លោកធ្លាប់បណ្ដឹងថាខណៈដែលបណ្ដឹងរបស់លោកធ្លាក់ដល់ដៃសាលាដំបូងរាជធានីភ្នំពេញ គឺលោកអត់មានដកបណ្ដឹងនោះទេ គឺមានតែជំរុញអោយមេធាវីដែលកាន់ការងារលើបណ្ដឹងរបស់លោកពន្លឿនដំណោះស្រាយនោះអោយបានលឿនបំផុតក្នុងរបងតុលាការ។
លោកថាខ្លួនមានឯកសារគ្រប់គ្រាន់លើអ្វីដែលបានចោទប្រកាន់នោះ ទើបហ៊ានដាក់បណ្ដឹងហើយមិនមានជំហរចរចារនៅក្រៅប្រព័ន្ធតុលាការ។ លោកថាក្នុងរយៈពេលទាក់ទងជាមួយកញ្ញា នី មុន្នីនាថ លោកបានផ្ដល់លុយកាក់អោយនាងបូកទាំងការរត់ច្បាប់អោយនាងបានចេញទៅរស់នៅអាមេរិកដោយស្របច្បាប់ផងអស់សរុប៧ម៉ឺនដុល្លារ តែបណ្ដាលមកពីនាងបែរជាមិនព្រមចេញទៅអាមេរិកតាមការសន្យារទើបក្លាយជាជម្លោះហើយឈានដល់ការផ្ដាច់ពាក្យ៕
