មេដឹកនាំបក្សប្រឆាំង លោក សម រង្ស៊ី ដែលកំពុងនិរទេសខ្លួននៅក្រៅប្រទេស បានបន្តរិះគន់ចំៗទៅលើលោកនាយករដ្ឋមន្ត្រីថា បានបន្តប្រើប្រាស់តុលាការធ្វើជាឧបករណ៍នយោបាយ ខណៈដែលតុលាការបានបន្តកាត់ទោសលោកមួយករណីទៀតទាក់ទិនបញ្ហាព្រំដែន។
ព្រឹកថ្ងៃទី២៧ខែធ្នូនេះ សាលាដំបូងរាជធានីភ្នំពេញ បានប្រកាសសាលក្រមឲ្យលោក សម រង្ស៊ី និងជំនួយការរបស់លោកពីរនាក់ទៀត ជាប់ទោស៥ឆ្នាំ ចោទពីបទសមគំនិតក្នុងអំពើក្លែងបន្លំឯកសារសាធារណៈ បទប្រើប្រាស់ឯកសារសាធារណៈក្លែងក្លាយ និងបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
លោក សម រង្ស៊ី សរសេរនៅលើហ្វេសប៊ុករបស់លោកនៅថ្ងៃនេះដែរថា៖ «ប្រទេសកម្ពុជា ជាប្រទេសមួយខុសគេក្នុងពិភពលោក ដែលអ្នកស្លូតត្រង់ ត្រូវគេផ្តន្ទាទោស តែជនឧក្រិដ្ឋមានសេរីភាព ធ្វើអំពើអាក្រក់បានតាមចិត្ត ប្រកបដោយនិទណ្ឌភាព»។
លោក សម រង្ស៊ី សរសេរទៀតថា៖ «ក្រោមរបបផ្តាច់ការ និងព្រៃផ្សៃរបស់លោក ហ៊ុន សែន ដែលប្រើប្រាស់តុលាការអាយ៉ងក្រោមបញ្ជាគាត់ដោយមិនចេះអៀនខ្មាស»។
លោក សម រង្ស៊ី បញ្ជាក់លើបណ្តាញសង្គមនោះទៀតថា ការដែលតុលាការចេញសាលក្រមផ្តន្ទាទោសលោក និងសហការីទាំងពីរនាក់នេះ លោកថាជាការជំរុញកម្លាំងចិត្តកាន់តែខ្លាំងក្នុងការតស៊ូដើម្បីនាំមកនូវការផ្លាស់ប្តូរ តាមបែបបទប្រជាធិបតេយ្យនៅឆ្នាំ២០១៧និង២០១៨ខាងមុខ។
ទោះជាយ៉ាងណា លោក ហ៊ុន សែន ធ្លាប់អះអាងថា ចំណាត់ការនានារបស់តុលាការដែលបានចាប់ឃុំខ្លួនមន្ត្រីសង្គមស៊ីវិលរួមទាំងចាប់ខ្លួនសកម្មជនបក្សប្រឆាំងផង ថាជាវិធានការច្បាប់។
លោក សម រង្ស៊ី បាននិរទេសខ្លួនម្តងទៀតនៅចុងឆ្នាំ២០១៥ បន្ទាប់ពីតុលាការបានសើរើបណ្តឹងចាស់ដែលប្តឹងដោយមន្ត្រីជាន់ខ្ពស់របស់គណបក្សប្រជាជនកម្ពុជាគឺលោក ហោ ណាំហុង ពីបទបរិហាកេរ្តិ៍ឡើងវិញ។
បច្ចុប្បន្ននេះ មេបក្សប្រឆាំងដែលកំពុងនិរទេសខ្លួនរូបនោះ ត្រូវបានតុលាការផ្តន្ទាទោសច្រើនករណី ដូចជាចោទពីបទបរិហាកេរ្តិ៍លោក ហ៊ុន សែន ទាក់ទិននឹងចំនួនអ្នកគាំទ្រហ្វេសប៊ុកជាដើម៕
