បុរសអាយុ ២១ឆ្នាំម្នាក់ បានរងប្រអប់ដៃខាងឆ្វេង បន្ទាប់ពីបុរសរូបនោះ បានដុតផាវគ្រាប់បែក កាលពីថ្ងៃម្សិលមិញនេះ ខណៈអាជ្ញាធរកម្ពុជាបានហាមឃាត់ការដុតផាវនៅអំឡុងពិធីបុណ្យចូលឆ្នាំចិន។
អធិការរងនគរបាលស្រុកភ្នំព្រឹក លោក សារ៉េត វិសេដ្ឋ ត្រូវបានវេបសាយអគ្គស្នងការនគរបាលជាតិកម្ពុជា ដកស្រង់សម្ដីចុះផ្សាយថា លោក លី ទិត្យ ពលរដ្ឋរស់នៅភូមិភ្នំតូច ឃុំពេជចិន្តា បានរងរបួសរហែកប្រអប់ដៃខាងឆ្វេងដូចជ្រៀកងៀត បន្ទាប់ពីដុតផាវគ្រាប់បែកនៅនឹងដៃ កាលពីល្ងាចថ្ងៃទីម្សិលមិញ។
មន្ត្រីនគរបាលរូបនេះ បានបញ្ជាក់ថា ជនរងគ្រោះរូបនេះ ត្រូវបានគេបញ្ជូនទៅសង្គ្រោះនៅឯមណ្ឌលសុខភាពពេជ្រចិន្តា។
អគ្គស្នងការនគរបាលជាតិកម្ពុជា កាលពីថ្ងៃទី២៦ ខែមករានេះ បានសេចក្ដីណែនាំមួយ ដោយបានហាមឃាត់ការដុតផាវនៅអំឡុងពិធីបុណ្យចូលឆ្នាំចិននេះ៕