ប្រធានាធិបតីអាមេរិក លោក ដូណាល់ ត្រាំ នៅថ្ងៃនេះ បានចុះហត្ថលេខាលើបទបញ្ជាមួយ ឲ្យចាប់ផ្ដើមឡើងវិញនូវអ្វីដែលលោកហៅថា “ការកសាងកម្លាំងទ័ពដ៏អស្ចារ្យឡើងវិញ” ដោយសន្យាផ្ដល់យន្តហោះចម្បាំង នាវាចម្បាំងថ្មីៗ និងធនធានបន្ថែមទៀតសម្រាប់កងទ័ព។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ក្នុងពិធីមួយនៅមន្ទីរបញ្ចកោណ លោក ត្រាំ និយាយថា៖ “កម្លាំងយោធារបស់យើង នឹងគ្មាននរណាម្នាក់មកចោទសួរនោះឡើយ ប៉ុន្តែ ក៏គ្មាននរណាមកចោទសួរអំពីការប្ដេជ្ញាចិត្តរបស់យើងចំពោះសន្តិភាពផងដែរ។ យើងពិតជាចង់បានសន្តិភាព”។
លោក ត្រាំ បានព្យាករថា សភាដែលជាអ្នកកំណត់លើការចំណាយរបស់រដ្ឋាភិបាលនោះ នឹងសប្បាយចិត្តនៅពេលឃើញសំណើចំណាយថ្មីរបស់សេតវិមាន សម្រាប់វិស័យយោធា។
នៅអំឡុងយុទ្ធនាការឃោសនាបោះឆ្នោត លោក ត្រាំ បានបញ្ជាក់ច្បាស់ថា លោកចង់ពង្រីកអំណាចយោធា និងកំពង់ផែសម្រាប់យន្តហោះចម្បាំង និងនាវាចម្បាំង។
លោក ត្រាំ បានលើកឡើងថា លោកចង់ពង្រីកនាវាចម្បាំងទៅដល់ ៣៥០គ្រឿង ពោលគឺកើនឡើងពីចំនួន ២៧៤គ្រឿងនាពេលបច្ចុប្បន្ន និងច្រើនជាងចំនួន ៣១០ ដែលជាគោលដៅទៅទៀត។
លោក ត្រាំ បានចេញបញ្ជាថ្មីបែបនេះតែជាងមួយសប្ដាហ៍ក្រោយពីលោកឡើងកាន់តំណែងជាផ្លូវការកាលពីថ្ងៃសុក្រសប្ដាហ៍មុន។
លោក ត្រាំ ក៏ត្រូវបានគេរំពឹងថានឹងបញ្ជាទៅរដ្ឋមន្ត្រីក្រសួងការពារជាតិថ្មីរបស់អាមេរិក លោក James Mattis ឲ្យបន្តឹងប្រតិបត្តិការប្រឆាំងនឹងក្រុមរដ្ឋឥស្លាម នៅអ៊ីរ៉ាក់ និងស៊ីរី ដោយបំពាក់សព្វាវុធធុនធ្ងន់ដល់ទាហានអាមេរិក៕
