គណៈប្រតិភូជាន់ខ្ពស់មួយក្រុមរបស់កូរ៉េខាងជើង បានធ្វើដំណើរទៅដល់ប្រទេសម៉ាឡេស៊ី នៅថ្ងៃនេះ ដើម្បីទៅទទួលសពបុរសម្នាក់ ដែលគេជឿថា ជាលោក គីម ជុងណាម បងប្រុសម្ដាស់ទីទៃរបស់មេដឹកនាំកូរ៉េខាងជើង លោក គីម ជុងអ៊ុន។ នេះដោយយោងតាមការចុះផ្សាយរបស់សារព័ត៌មាន Channel News Asia។
គណៈប្រតិភូនោះ មានទាំងលោក រីង តុងអ៊ីល អតីតអគ្គរដ្ឋទូតរងរបស់កូរ៉េខាងជើងប្រចាំនៅអង្គការសហប្រជាជាតិផងដែរ។
ថ្លែងទៅកាន់អ្នកយកព័ត៌មាននៅខាងក្រៅស្ថានទូតកូរ៉េខាងជើងនៅទីក្រុងគួឡាឡំពួរនៅថ្ងៃនេះ លោក រី តុងអ៊ីល បាននិយាយថា គោលបំណងនៃដំណើររបស់គណៈប្រតិភូកូរ៉េខាងជើងនេះ គឺដើម្បីដោះស្រាយ “បញ្ហាមនុស្សធម៌”។
លោក រី តុងអ៊ីល បានបន្ថែមថា ក្រុមរបស់លោកនឹងពិភាក្សាជាមួយក្រុមមន្ត្រីរដ្ឋាភិបាលម៉ាឡេស៊ីទៅលើបញ្ហា ៣ ក្នុងនោះមានការបញ្ជូនសពពលរដ្ឋកូរ៉េខាងជើង ដែលបានស្លាប់កាលពីថ្ងៃទី១៣ ខែកុម្ភៈ ការដោះលែងពលរដ្ឋកូរ៉េខាងជើងដែលត្រូវអាជ្ញាធរម៉ាឡេស៊ីចាប់ខ្លួនពាក់ព័ន្ធនឹងឃាតកម្មនេះ និងចុងក្រោយគឺដំណើរវិវត្តន៍នៃទំនាក់ទំនងមិត្តភាពរវាងរដ្ឋាភិបាលប្រទេសទាំងពីរ។
ស្ត្រីជាពលរដ្ឋកូរ៉េខាងជើងម្នាក់ឈ្មោះ រី ចុងជុល ត្រូវបានសមត្ថកិច្ចម៉ាឡេស៊ីចាប់ខ្លួន ពាក់ព័ន្ធនឹងឃាតកម្មនៅព្រលានយន្តហោះទីក្រុងគួឡាឡំពួរ។ រហូតមកដល់ពេលនេះ យ៉ាងហោចណាស់ ជនសង្ស័យជាពលរដ្ឋកូរ៉េខាងជើង ៤នាក់ ត្រូវបានសមត្ថកិច្ចម៉ាឡេស៊ីតាមស្វែងរកចាប់ខ្លួនដើម្បីស៊ើបអង្កេត៕