រដ្ឋាភិបាលនៅថ្ងៃអង្គារនេះ បានសម្រេចបដិសេធសំណើនាំចេញទឹកដោះម្តាយ ពីប្រទេសកម្ពុជាទៅកាន់សហរដ្ឋអាមេរិច ដែលស្នើឡើងដោយក្រុមហ៊ុនធ្វើអាជីវកម្មមួយឈ្មោះ «គុណមាតា» ដែលមានឈ្មោះក្នុងបញ្ជីពាណិជ្ជកម្មហៅថា Ambrosia Labs ដោយអះអាងថា ទោះកម្ពុជាក្រ ក៏មិនដល់កម្រិតលក់ទឹកដោះម្តាយ។
លិខិតចុះថ្ងៃទី២៨មីនា២០១៧ របស់ទីស្តីការគណៈរដ្ឋមន្ត្រី ដោយយោងចំណារ របស់នាយករដ្ឋមន្ត្រី លើលិខិតក្រសួងសុខាភិបាលចុះថ្ងៃទី២៤មីនា សម្រេចថា ត្រូវចាត់ការទប់ស្កាត់បន្ទាន់ចំពោះការ ប្រមូលទិញ និងនាំចេញទឹកដោះម្តាយពីកម្ពុជា។ លិខិតបញ្ជាក់ចំណុចបន្ទាប់ទៀតថា ទោះជាកម្ពុជាក្រលំបាកយ៉ាងណា ក៏មិនដល់កំរិតលក់ទឹកដោះម្តាយដែរ។
អនុប្រធានមជ្ឈមណ្ឌលជាតិគាំពារមាតានិងទារក លោកស្រី ប្រាក់ សុភ័ណ្ឌនារី មានប្រសាសន៍ថា ទឹកដោះម្តាយចាត់ទុកដូចសរីរាង្គមនុស្សដែរគឺមិនអាចជួញដូរបានទេ។
លោកស្រីថា៖ «ពេលខ្លះគិតថាក្រគាត់លក់ លុយប៉ិនហ្នឹងមិនច្រើនប៉ុន្មានទេ ប៉ុន្តែបើមិនងាកទៅមើលការចិញ្ចឹមកូនឲ្យបានត្រឹមត្រូវ កូនមិនរឹតតែមានបញ្ហាទៀតហើយ?។ ទីពីរ និយាយឲ្យខ្លី គឺខុសច្បាប់ យើងមិនអនុញ្ញាតឲ្យធ្វើអញ្ចឹងតែម្តង» ។
ទីប្រឹក្សាឯករាជ្យផ្នែកអាហាររូបត្ថម្ភកុមារ និងការការពារកុមារ លោកស្រី សួង សុខសោភា គាំទ្រជំហររបស់រដ្ឋាភិបាលដែលធ្វើបែបនេះ ហើយលោកស្រីគិតថា វាគ្រោះថ្នាក់បំផុតពេលប្រមូលទិញពីស្ត្រីនៅសហគមន៍ក្រីក្រ។
លោកស្រីថា៖ «ជួនកាលម្តាយនៅក្នុងស្រុកខ្មែរគាត់ក្រីក្រពេក គាត់សុខចិត្តផ្តាច់ពីមាត់កូនគាត់ដើម្បីលុយកាក់បន្តិចបន្តួច អញ្ចឹងគាត់សុខចិត្តលក់។ នៅពេលដែលគាត់លក់បានន័យថា កូនគាត់ប្រឈមមុខនឹងការពុំមានទឹកដោះម្តាយក្នុងការបៅគ្រាប់គ្រាន់ ហើយនៅស្រុកយើង គឺយើងអត់ដឹងពីការប្រមូលទិញ នីតិវិធីធ្វើយ៉ាងណាគឺអត់ដឹងពីរឿងហ្នឹង»។
អ្នកជំនាញឲ្យដឹងថា ទឹកដោះម្តាយ មានគុណប្រយោជន៍ច្រើនសម្រាប់ទារកទើបកើត ហើយទឹកដោះម្តាយដំបូងផ្តល់នូវសារធាតុចិញ្ចឹមដូចជាវ៉ាក់សាំងធម្មជាតិ។ ទឹកដោះម្តាយជួយការពារទារកមិនឲ្យឈឺថ្កាត់ ជួយទៅដល់ភាពលូតលាស់ និងពេលធំឡើងការពារមិនឲ្យកើតជម្ងឺធាត់ ទឹកនោមផ្អែម លើសឈាមជាដើម។