សាលារាជធានីភ្នំពេញបានសន្យាអភិវឌ្ឍន៍នៅនឹងកន្លែងតាមបណ្តោយផ្លូវដែកក្នុងរាជធានីភ្នំពេញ តាមការស្នើសុំរបស់ប្រជាពលរដ្ឋ តែពលរដ្ឋមិនមានជំនឿលើការសន្យានោះទេ ដោយថាមិនមានភស្តុងតាងបញ្ជាក់។
ការសន្យានេះ ធ្វើឡើងបន្ទាប់ពីប្រជាពលរដ្ឋចំនួន៦សហគមន៍ដែលមានគ្នាប្រមាណ១៥០នាក់ បានប្រមូលផ្តុំគ្នានៅមុខសាលារាជធានីភ្នំពេញ ដើម្បីស្នើទៅស្ថាប័ននេះឲ្យពន្លឿនបង្ហាញគម្រោងអភិវឌ្ឍន៍បណ្តោយផ្លូវដែក ជូនពួកគេឲ្យបានឆាប់។
បន្ទាប់ពីជួបជាមួយអភិបាលរាជធានីភ្នំពេញលោក ប៉ា សុជាតិវង្ស តំណាងប្រជាសហគមន៍១៦ គឺអ្នកស្រី ទិត្យ ស្រីស បានរៀបរាប់ប្រាប់អ្នកសារព័ត៌មានថា អភិបាលរាជធានីបានប្រាប់ពួកគេដែលរស់នៅចាប់ពីម្តុំស្ថានីយ៍រថភ្លើង រហូតដល់ព្រលានយន្តហោះពោចិនតុង ត្រូវឲ្យរក្សាភាពស្ងៀមស្ងាត់ ដោយថាទុកឲ្យសាលារាជធានីធ្វើការសិក្សាពីផលប៉ះពាល់ និងធ្វើវេទិកាសាធារណៈប្រាប់ប្រជាពលរដ្ឋមុនចេញគម្រោងអភិវឌ្ឍន៍នៅតំបន់នោះ។
យ៉ាងណាក៏ដោយ អ្នកស្រី ទិត្យ ស្រីស ថាគាត់មិនមានជំនឿលើការសន្យារបស់សាលារាជធានីភ្នំពេញនោះទេ ដោយថា ការសន្យានោះមិនបានធ្វើជាលិខិតលាយលក្ខណ៍អក្សរ។ និយាយថា «ពួកខ្ញុំឲ្យគាត់ធ្វើជាលិខិតលាយល័ក្ខអក្សរឲ្យមានភាពអះអាងមក គាត់ថាអត់មាន គាត់ថាបើមិនជឿគាត់ ជឿអ្នកណាទៀត គាត់គ្រាន់តែនិយាយតែមាត់ទទេ ខ្ញុំអត់ទេ[អត់ជឿ] ព្រោះខ្ញុំធ្លាប់មានពីមុនមក គាត់ធ្លាប់និយាយអញ្ចឹង តែដូចអត់មានប្រសិទ្ធភាព»។
ប្រជាសហគមន៍ភូមិ១៥ អ្នកស្រី ម៉ែន ណារ៉ាត បានអះអាងថា ពួកគេស្នើទៅសាលារាជធានីភ្នំពេញធ្វើការអភិវឌ្ឍន៍នៅតាមបណ្តោយផ្លូវដែកពីអ័ក្សផ្លូវម្ខាង ៧ទៅ៨ម៉ែត្រកន្លះ ដោយថា ទុក៥ទៅ៦ម៉ែត្រ សម្រាប់សង់លំនៅឋានជូនប្រជាពលរដ្ឋដែលរងផលប៉ះពាល់ទំាងនោះ។អ្នកស្រីថាបើសាលារាជធានីធ្វើការអភិវឌ្ឍន៍ ពីអ័ក្សផ្លូវម្ខាង១៥ម៉ែត្រ ធ្វើឲ្យប៉ះពាល់ប្រជាពលរដ្ឋរាប់រយគ្រួសារនិងមិនអាចធ្វើការអភិវឌ្ឍន៍នៅនឹងកន្លែងបាននោះទេ។ អ្នកស្រីនិយាយថា «ពីអ័ក្សផ្លូវទៅគឺ១៥ម៉ែត្រ គឺផ្ទះខ្ញុំអស់ហើយ ១៥ម៉ែត្រគាត់ឲ្យចាប់ដី ចាប់ម៉េចបើខ្ញុំយល់ថា ក្នុងមួយផ្ទះខ្ញុំដឹងថា មានតែ៤ម៉ែត្រ ៣ម៉ែត្រកន្លះ ៤ម៉ែត្រកន្លះ ៥ម៉ែត្រគឺតិចណាស់អត់មានទេ មួយជួរហ្នឹង តើធ្វើការអភិវឌ្ឍម៉េចទៅ បើ១៥ម៉ែត្រមានផ្ទះគេពីក្រោយទៀត តែបើខ្ញុំសុំតែ៨ម៉ែត្រកន្លះនៅសល់ អាចឲ្យប្រជាពលរដ្ឋរស់នៅបានច្រើន»។
អ្នកនាំពាក្យសាលារាជធានីភ្នំពេញលោក មាន ចាន់យ៉ាដា មានប្រសាសន៍ថា ប្រជាពលរដ្ឋនៅតាមបណ្តោយផ្លូវដែក ត្រូវតែជឿជាក់លើការសន្យារបស់អភិបាលរាជធានីភ្នំពេញ ដោយថាគាត់ជាអាណាព្យាបាល គ្រប់គ្រង និងជាអ្នករៀបចំរចនាសម្ព័ន្ធនៅក្នុងរាជធានីភ្នំពេញ។ លោកមានប្រសាសន៍ថា «ក្នុងនាមរដ្ឋបាលរាជធានីភ្នំពេញ ឯកឧត្តមអភិបាល គឺជាអភិបាលក្រុងដែលគាត់និយាយជាមួយពលរដ្ឋហើយបើគាត់មិនទុកចិត្តទៀត កាត់ទុកចិត្តពីណា ទុកចិត្តអ្នកដែលគេប្រូ ទុកចិត្តអ្នកគ្រាន់តែថា ឬទុកចិត្តអ្នក ធ្វើ រដ្ឋបាលរាជធានីជាអ្នកធ្វើ»។
ចំណែកប្រជាសហគមន៍១៧ លោក នូ សារិន បានព្រមានថា បើសាលារាជធានីភ្នំពេញមិនធ្វើតាមការសន្យាទេ លោកថាប្រជាសហគមន៍ទំាង៦នឹងតវ៉ារហូតមានដំណោះស្រាយ។ លោកព្រមានថា «បើអត់គោរពតាមពាក្យសម្តីរបស់ខ្លួនទេ ភាពជាអ្នកដឹកនាំ និយាយហើយមិនគោរពពាក្យសម្តីខ្លួនឯង បងប្អូនខ្ញុំជាប្រជាពលរដ្ឋ គឺជាម្ចាស់នៃអំណាច គឺជាម្ចាស់នៃប្រទេស ម្ចាស់នៃទឹកដី បងប្អូនខ្ញុំជាម្ចាស់លំនៅឋាន បងប្អូនខ្ញុំមិនអាចដេកសង្ងំស្ងៀមដោយគាត់និយាយហើយមិនគោរពតាមកិច្ចសន្យារបស់គាត់នោះទេ ខ្ញុំនិងមកតវ៉ា ដើម្បីឲ្យគាត់ជាលើកចុងក្រោយបន្តទៀត»។
ប្រធានក្រុមការងារពិសេសសិទ្ធិលំនៅឋានលោក សៀ ភារម្យ យល់ថា បើមន្ត្រីរដ្ឋាភិបាលមិនធ្វើការដោះស្រាយបញ្ហានេះឲ្យមានតម្លាភាព នឹងធ្វើឲ្យពលរដ្ឋរិះគន់លើការដឹកនាំរបស់រដ្ឋាភិបាលដូចកាលពីអតីតកាលផងដែរ។លោកនិយាយថា «បើសិនជាយើងធ្វើឲ្យគាត់មានភាពរញ៉េរញ៉ៃ ហើយប្រជាពលរដ្ឋនៅតែចេញតវ៉ា ប្រជាពលរដ្ឋគេអាចចេញចោទប្រកាន់ថាអាជ្ញាធរមិនមានសមត្ថភាពក្នុងការដោះស្រាយបញ្ហា សុខមាលរបស់ប្រជាពលរដ្ឋ យើងគួរតែបញ្ចៀសបញ្ហាហ្នឹង យើងគួរតែធ្វើការអភិវឌ្ឍឲ្យមានការពេញចិត្តពេញថ្លើម ពីប្រជាពលរដ្ឋទៅ បានប្រជាពលរដ្ឋលោកមានការគំាទ្រ ឬក៏ស្រលាញ់រដ្ឋាភិបាល កុំឲ្យដូចអតីតកាល»។
គួរបញ្ជាក់ថា ដើមចមដែលនាំឲ្យពលរដ្ឋមានការព្រួយបារម្ភពីគម្រោងអភវិឌ្ឍន៍របស់សាលារាជធានីភ្នំពេញ នៅតាមបណ្តោយផ្លូវដែកនោះ ដោយពួកគេថា កន្លងទៅការអភិវឌ្ឍនៅក្នុងរាជធានីភ្នំពេញមានការបណ្ដេញពលរដ្ឋចេញពីលំនៅស្ថានមានដូចជា បឹងកក់ បុរីកីឡា ដីក្រហម សំបុកចាប ដោយបើកផ្លូវឲ្យក្រុមហ៊ុនចូលអភិវឌ្ឍ ហើយមកដល់ពេលនេះអ្នកខ្លះមិនទាន់បានសំណងនៅឡើយ៕