ក្រុមមន្ត្រីបាននិយាយនៅថ្ងៃនេះថា កូរ៉េខាងជើងបានសាកល្បងម៉ាស៊ីនបាញ់គ្រាប់រ៉ុកកែតមួយទៀត ដែលមន្ត្រីអាមេរិកជឿថា អាចជាផ្នែកមួយនៃកម្មវិធីរបស់កូរ៉េខាងជើង ក្នុងការអភិវឌ្ឍគ្រាប់មីស៊ីលឆ្លងទ្វីប។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
Reuters បានផ្សាយបន្តថា ការសាកល្បងនេះ បានកើតឡើងបន្ទាប់ពីការសាកល្បងម្ដងរួចមកហើយនៅដើមខែមីនានេះ ហើយជាសញ្ញាថ្មីមួយទៀតបង្ហាញពីការរីកចម្រើននៃកម្មវិធីផលិតអាវុធរបស់ក្រុងព្យុងយ៉ាង។ ការសាកល្បងនេះ បានកើតឡើងចំពេលដែលអាមេរិកមានក្ដីបារម្ភកាន់តែខ្លាំងទៅលើការសាកល្បងគ្រាប់មីស៊ីល និងគ្រាប់បែកនុយក្លេអ៊ែរ នាពេលអនាគត។
ក្រុមមន្ត្រីអាមេរិកជាច្រើន ដែលនិយាយដោយមិនបញ្ចេញឈ្មោះនោះ បាននិយាយថា ការសាកល្បងនោះ បានកើតឡើងកាលពីរាត្រីថ្ងៃសុក្រសប្ដាហ៍មុន ហើយម៉ាស៊ីនបាញ់គ្រាប់រ៉ុកកែតនោះ អាចត្រូវបានគេប្រើនៅក្នុងការបាញ់គ្រាប់មីស៊ីលឆ្លងទ្វីប៕
កាលពីដើមខែមីនានេះ មេដឹកនាំកូរ៉េខាងជើង លោក គីម ជុងអ៊ុន បាននិយាយថា ប្រទេសលោកបានសាកល្បងម៉ាស៊ីនថ្មី នៅឯស្ថានីយ៍បាញ់គ្រាប់រ៉ុកកែតតុងឆាងរី ដោយថា ជាកំណើតថ្មីនៃឧស្សាហកម្មគ្រាប់រ៉ុកកែត៕