ប្រធានគណបក្សសង្គ្រោះជាតិឲ្យដឹងថា លោកទៅបំពេញទស្សនកិច្ចនៅសហរដ្ឋអាមេរិកនៅពេលនេះ នឹងមានការជួបជាមួយមន្ត្រីសំខាន់ៗមួយនៅចំនួននៃរដ្ឋបាលរបស់ប្រធានាធិបតី ត្រាំ និងជួបសមាជិករដ្ឋសភា ព្រឹទ្ធសភាសហរដ្ឋអាមេរិកនៅទីក្រុងវ៉ាស៊ីនតោនផងដែរ។
លោក កឹម សុខា បានសរសេរនៅលើហ្វេសប៊ុករបស់លោកថា បានចាកចេញពីកម្ពុជានៅរសៀលថ្ងៃព្រហស្បតិ៍ម្សិលមិញ ដើម្បីជួបជាមួយពលរដ្ឋខ្មែរនៅអាមេរិកនៅក្នុងរដ្ឋចំនួន១០។ ក្នុងដំណើរទស្សនកិច្ចនេះលោក កឹម សុខា ក៏បញ្ជាក់ថា លោកមានគម្រោងជួបមន្ត្រីសំខាន់ៗរបស់អាមេរិកជាច្រើនទៀត។
ទោះយ៉ាងណាលោក កឹម សុខា មិនបានបញ្ជាក់ថា បញ្ហាអ្វីខ្លះដែលលោកនឹងត្រូវយកទៅនិយាយជាមួយ ពលរដ្ឋខ្មែរ និង មន្ត្រីរបស់អាមេរិកនោះទេ ខណៈស្ថានភាពនយោបាយបច្ចុប្បន្នគណបក្សប្រឆាំងរបស់លោកកំពុងប្រឈមុខជាមួយគណបក្សកាន់អំណាច ហើយមន្ត្រីចំនួន១៦រូបកំពុងជាប់ពន្ធនាគារ៕