ប្រធានាធិបតីអាមេរិក លោក ត្រាំ បានថ្លែងកោតសរសើរដល់មេដឹកនាំចិនលោក ស៊ី ជីនពីង ថាធ្លាប់មានស្នាដៃល្អ ក្នុងការដោះស្រាយវិបត្តិនៅកូរ៉េខាងជើង ហើយបានហៅលោកស៊ីថា «ជាបុរសល្អណាស់ » ដែលស្រលាញ់ប្រទេសរបស់លោក។
ប្រធានាធិបតីអាមេរិកបានប្រាប់ទីភ្នាក់ងារព័ត៌មានរ៉យទ័រថា លោកត្រូវការដោះស្រាយបញ្ហាតាមវិធីការទូត ប៉ុន្តែលោកថា វាមានការលំបាក ចំណែកជម្រើសជម្លោះប្រើកម្លាំងកំពុងតែមានច្រើនជាង។
លោកថ្លែងថា វាពិបាកខ្លាំងក្នុងការធ្វើការជាមួយលោក គីម ជុងអ៊ុន មេដឹកនាំកូរ៉េខាងជើងដែលមានអាយុក្មេងនោះ។
ក្រុមប្រឹក្សាសន្តិសុខអង្គការសហប្រជាជាតិ បើកប្រជុំនៅព្រឹកថ្ងៃសុក្រនេះ ដើម្បីពិភាក្សារកដំណោះស្រាយជុំវិញបញ្ហាប្រឈមនៅកូរ៉េខាងជើង។
រដ្ឋមន្ត្រីការបរទេសអាមេរិកលោក Rex Tillerson បានថ្លែងថា អាមេរិក និង ដាក់ចេញនូវទណ្ឌកម្មបន្ថែមលើកូរ៉េខាងជើង បើសិនជាមានការសាកល្បងអាវុធនុយក្លេអ៊ែជាថ្មីទៀត។
ក្រោយពេលលទ្ធផលឆ្នោតបង្ហាញថា លោក ត្រាំ ទទួលបានជ័យជម្នះភ្លាមៗនោះ លោកបានចោទចិនថា មិនបានធ្វើការគ្រប់គ្រាន់ក្នុងការដោះស្រាយបញ្ហានៅកូរ៉េខាងជើង និងបានស្នើឲ្យអាមេរិកអាចធ្វើសកម្មភាពដោយឯកតោភាគី ប្រឆាំងកូរ៉េខាងជើង៕