តុលាការវៀតណាមបានកាត់ទោសប្រហារជីវិតមនុស្សចំនួន៨នាក់ ពាក់ព័ន្ធនឹងការរត់ពន្ធគ្រឿងញៀន ចំនួន៣០០គីឡូក្រាមឆ្លងដែនពីវៀតណាមទៅកាន់ប្រទេសចិន ដែលលាក់បន្លំក្នុងកេសផ្ទុកឧស្ម័ន។
សារព័ត៌មានវៀតណាម An Ninh Thu Do ចុះផ្សាយកាលពីថ្ងៃព្រហស្បតិ៍ម្សិលមិញថា ក្រុមនោះត្រូវបានកាត់ទោសប្រហារជីវិតពាក់ព័ន្ធរត់ពន្ធគ្រឿងញៀនពីវៀតណាមឆ្លងដែនទៅប្រទេសចិនចន្លោះឆ្នាំ២០០៤ ដល់២០១៥។
ទោះយ៉ាងណាក្នុងចំណោម៨នាក់នោះមានការបន្ថយពីការសម្លាប់ដោយឲ្យជាប់ពន្ធនាការអស់មួយជីវិតវិញខ្លះដោយសារមានអ្នកខ្លះមានកូនតូច។
វៀតណាមត្រូវបានគេដឹងថា ប្រទេសដែលរឹតបន្តឹងខ្លាំងបំផុតលើពិភពលោកចំពោះការចរាចរណ៍គ្រឿងញៀន។ ចំពោះអ្នកដែលរត់ពន្ធគ្រឿងញៀនច្រើនជាង៦០០ក្រាមនៃហេរ៉ូអ៊ីន ឬ ច្រើនជាង២០គីឡូនៃអាភៀន អាចត្រូវប្រឈមកាត់ទោសប្រហារជីវិត។
របាយការណ៍ក្រសួងសន្តិសុខសាធារណៈបានឲ្យដឹងថា ចាប់ពីខែសីហាឆ្នាំ២០១៣ ដល់ខែមិថុនាឆ្នាំ២០១៦ វៀតណាមបានកាត់ទោសប្រហារជីវិតអ្នកពាក់ព័ន្ធគ្រឿងញៀនចំនួន៤២៩នាក់៕