ក្រសួងយុត្តិធម៌នឹងរៀបចំវគ្គស្វែងយល់ពីក្រមព្រហ្មទណ្ឌ និង ក្រមនីតិវិធីព្រហ្មទណ្ឌនៃព្រះរាជាណាចក្រកម្ពុជា មួយដល់អ្នកសារព័ត៌មានជាតិ និង អន្តរជាតិដើម្បីបានស្វែងយល់ពីចំណាត់ការនីតិវិធីនានារបស់អយ្យការ និង តុលាការកម្ពុជាក្នុងដំណើរការសំណុំរឿងព្រហ្មទណ្ឌ។
ក្រសួងយុត្តិធម៌បានចេញសេចក្ដីជូនដំណឹងមួយចុះថ្ងៃទី ២៨ ខែឧសភា ស្ដីពីវគ្គស្វែងយល់អំពីក្រមព្រហ្មទណ្ឌ និងក្រមនីតិវីធីព្រហ្មទណ្ឌនៃព្រះរាជាណាចក្រកម្ពុជាដល់អ្នកសារព័ត៌មាន។ ក្នុងសេចក្ដីជូនដំណឹងឲ្យដឹងថា ក្រសួងយុត្តិធម៌សហការជាមួយនឹងក្លឹបអ្នកការសែតកម្ពុជានឹងរៀបចំវគ្គស្វែងយល់នេះ ជាភាសាខ្មែរ នៅថ្ងៃទី ០២ ខែ មិថុនា ចាប់ពីម៉ោង ៩ព្រឹក ដល់ ម៉ោង ១២ ថ្ងៃត្រង់នាទីស្ដីការក្រសួងយុត្តិធម៌។
បើតាមក្រសួងយុត្តិធម៌បញ្ជាក់ថា វគ្គស្វែងយល់នេះមិនមែនជាសន្និសិទកាសែត ឬជាវេទិការសម្រាប់សួរដេញដោលទាក់ទងនឹងសំណុំរឿងជាក់ស្ដែងណាមួយនោះទេ។
បើតាមសេចក្ដីជូនដំណឹងដដែលឲ្យដឹងថា អ្នកសារព័ត៌មានជាតិ និង អន្តរជាតិដែលមានបំណងចូលរួមក្នុងវគ្គស្វែងយល់នេះអាចចុះឈ្មោះជាមុនឲ្យបានមុនម៉ោង ៥ ល្ងាចថ្ងៃទី ៣១ ខែ ឧសភា ដោយទាក់ទងទៅកាន់មន្ត្រីទំនាក់ទំនងលោក កាន់ សាវី ដែលមានលេខ ០៦១ ៧៦៧ ៧៧៨ និង លោក ញឹម សុធា តាមរយៈលេខទូរស័ព្ទ ០១៦ ៩៧៤ ៤៤៤ ឬក៏អាចចុះឈ្មោះតាមរយៈក្លឹបអ្នកកាសែតកម្ពុជាក៏បាន៕
