ក្រុមមេដឹកនាំបណ្ដាប្រទេសមានសេដ្ឋកិច្ចធំៗទាំង ៧ ហៅកាត់ថា G-7 បានបញ្ចប់កិច្ចប្រជុំប្រចាំឆ្នាំរបស់ខ្លួនហើយ ដោយបង្ហាញឲ្យឃើញនូវការខ្វែងគំនិតគ្នាជុំវិញបញ្ហាបម្រែបម្រួលអាកាសធាតុ ខណៈដែលប្រធានាធិបតីអាមេរិក លោក ដូណាល់ ត្រាំ ដកខ្លួនចេញពីការដាក់សម្ពាធពីបណ្ដាប្រទេសប្រជាធិបតេយ្យធំៗ ឲ្យដើរតាមក្រឹតក្រមរួមមួយ។ នេះដោយយោងតាមការផ្សាយរបស់ AFP។
លោក ត្រាំ បានបង្ហោះសារលើ Twitter ថា លោកនឹងបង្ហាញឲ្យដឹងនៅសប្ដាហ៍ក្រោយថា តើលោកនឹងរក្សាទុកអាមេរិកនៅក្នុងកិច្ចព្រមព្រៀងទីក្រុងប៉ារីស ស្ដីពីការទប់ស្កាត់ការបំភាយឧស្ម័នកាបូន តទៅទៀត ឬយ៉ាងណា។ លោក ត្រាំ បានសន្យាទាត់ចោលកិច្ចព្រមព្រៀងនេះ នៅពេលលោកធ្វើយុទ្ធនាការឃោសនាបោះឆ្នោតសម្រាប់តំណែងប្រមុខសេតវិមានកាលពីឆ្នាំមុន។
ក្រុមប្រទេស G-7 បានទទួលស្គាល់ថា សមាជិកចំនួន ៦ បានប្ដេជ្ញាប្រកាន់ទៅតាមកិច្ចព្រមព្រៀងឆ្នាំ២០១៥ ខណៈដែលអាមេរិកដើរចេញពីកិច្ចព្រមព្រៀងនេះ។
ក្រុមប្រទេសនេះ បានចេញសេចក្ដីថ្លែងការណ៍ថា អាមេរិកកំពុងស្ថិតក្នុងដំណាក់កាលត្រួតពិនិត្យគោលនយោបាយស្ដីពីបម្រែបម្រួលអាកាសធាតុរបស់ខ្លួនឡើងវិញ និងកិច្ចព្រមព្រៀងទីក្រុងប៉ារីស ហេតុនេះ អាមេរិកស្ថិតក្នុងជំហរមិនឯកភាពនឹងប្រធានបទទាំងនេះទេ៕
