ក្រុមបះបោរឥស្លាម ដែលបានជាប់ដៃប្រយុទ្ធតាមដងផ្លូវជាមួយកងកម្លាំងសន្តិសុខរដ្ឋាភិបាលនៅភាគខាងប្រទេសហ្វីលីពីននោះ បានសម្លាប់ជនស៊ីវិល ១៩នាក់ ដែលនាំឲ្យចំនួនមនុស្សស្លាប់ជាផ្លូវការឡើងដល់ ៨៥នាក់ហើយ នៅអំឡុងពេលប៉ះទង្គិចគ្នារយៈពេលជិតមួយសប្ដាហ៍មកនេះ។ នេះដោយយោងតាមការផ្សាយរបស់ AFP ដែលបានដកស្រង់សម្ដីមន្ត្រីយោធាហ្វីលីពីន នៅថ្ងៃនេះ។
អំពើហឹង្សានេះ បានជំរុញឲ្យប្រធានាធិបតីហ្វីលីពីន លោក រ៉ូទ្រីហ្កូ ឌូទើតេ ប្រកាសច្បាប់សឹកកាលពីថ្ងៃអង្គារកន្លងមក នៅទូទាំងតំបន់ភាគខាងត្បូងហ្វីលីពីន ដើម្បីកម្ទេចនូវអ្វីដែលលោកនិយាយថា ជាការគំរាមកំហែងយ៉ាងឆាប់រហ័សពីសំណាក់ពួកបះបោរមានទំនាក់ទំនងនឹងក្រុមរដ្ឋឥស្លាម។
អាជ្ញាធរនិយាយថា ពួកបះបោរសម្លាប់ជនស៊ីវិល ១៩នាក់ នៅទីក្រុងម៉ារ៉ាវី ជាទីដែលមានពលរដ្ឋមូស្លីម ២សែន។ ចំនួនអ្នកស្លាប់រួមបញ្ចូលទាំងស្ត្រី ៣នាក់ និងក្មេងម្នាក់ ដែលត្រូវបានគេរកឃើញថា ស្លាប់នៅជិតសាកលវិទ្យាល័យមួយ។
អ្នកនាំពាក្យយោធាប្រចាំតំបន់ លោក ចូអា ហឺរ៉េរ៉ា បានប្រាប់ថា អ្នកស្លាប់ទាំងនោះ សុទ្ធតែជាជនស៊ីវិល ហើយអំពើហឹង្សានោះ គឺប្រឆាំងនឹងប្រជាជន។
ចំណែកអ្នកថតរូប AFP បានឃើញសពមនុស្ស ៨នាក់ទៀតនៅតាមផ្លូវមួយ នៅជាយទីក្រុងម៉ារ៉ាវី នៅថ្ងៃនេះ ដោយអ្នកស្រុកទីនោះបញ្ជាក់ថា ពួកគេជាបុគ្គលិកនៅក្នុងរោងម៉ាស៊ីនកិនស្រូវមួយ និងមហាវិទ្យល័យវេជ្ជសាស្ត្រ៕