តុលាការបានចេញដីកាបង្គាប់ឲ្យប្រធានប្រតិបត្តិបក្សប្រឆាំងប្រចាំរាជធានីភ្នំពេញ ចូលឆ្លើយបំភ្លឺពាក់ព័ន្ធនឹងហិង្សាទៅលើបុរសម្នាក់ ដែលបានកើតឡើងក្នុងពេលឃោសនាបោះឆ្នោត។
ក្នុងដីកាបញ្ជាឲ្យចូលខ្លួន ចុះថ្ងៃទី២៧មិថុនា សាលាដំបូងរាជធានីភ្នំពេញ បានបញ្ជាឲ្យប្រធានប្រតិបត្តិគណបក្សសង្រ្គោះជាតិនៅភ្នំពេញ លោក ម៉ន ផល្លា ចូលទៅបង្ហាញខ្លួននៅអធិការដ្ឋាននគរបាលខណ្ឌមានជ័យ ឲ្យបានមុនថ្ងៃទី១៧កក្កដាឆ្នាំ២០១៧ ដើម្បីឆ្លើយបំភ្លឺលើករណីហិង្សាដោយចេតនាមានស្ថានទម្ងន់ទោស កាលពីថ្ងៃទី២៨ឧសភាឆ្នាំ២០១៧។
កាលពីចុងខែឧសភា ក្នុងអំឡុងពេលនៃការឃោសនាបោះឆ្នោត យុវជនម្នាក់ដែលមានឈ្មោះថា សេក សាមុន បានដាក់ពាក្យបណ្តឹងដោយប្តឹងក្រុមយុវជនបក្សសង្ក្រោះជាតិជិត១០នាក់ ដោយយចោទថាបានប្រើហិង្សាមកលើខ្លួន ក្នុងពេលលោកជិះម៉ូតូប៉ះជាមួយក្បូនដង្ហែររបស់បក្សប្រឆាំងនៅភ្នំពេញ។
វីអូឌីមិនអាចទាក់ទងប្រធានប្រតិបត្តិគណបក្សសង្គ្រោះជាតិប្រចាំរាជធានីភ្នំពេញលោក ម៉ន ផល្លា បាននៅឡើយទេ ដោយលោកបានបិទទូរសព្ទ។
វីដេអូដែលត្រូវបានគេបង្ហោះនៅលើទំព័រហ្វេសប៊ុក កាលពីចុងខែឧសភានេះ បានបង្ហាញពីសកម្មជនបក្សប្រឆាំងម្នាក់ ដែលបានស្រែកឲ្យឈ្មោះ សេក សាមុន ថាបានជិះបញ្ច្រាសផ្លូវ ហើយក៏មានវីដេអូមួយទៀត បានបង្ហាញពីសកម្មភាពរបស់មនុស្សដែលពាក់អាវបក្សប្រឆាំងវាយទៅលើយុវជនរូបនោះ៕