បក្សកាន់អំណាចព្រមានទុកមុនពីឥទ្ធិពលច្បាប់គណបក្សនយោបាយថ្មី ដោយថាបក្សប្រឆាំងនឹងប្រឈមផលវិបាក នៅពេលច្បាប់នេះ ដាក់ឲ្យប្រើប្រាស់ជាផ្លូវការ បើនៅតែបណ្តោយឲ្យលោក សម រង្ស៊ី និយាយរិះគន់រដ្ឋាភិបាល។
អតីតមេដឹកនាំបក្សប្រឆាំងលោក សម រង្ស៊ី ដែលកំពុងនិរទេសខ្លួននៅក្រៅប្រទេស បានផ្តល់បទសម្ភាសន៍ដល់វិទ្យុព្រះសង្ឃឯករាជ្យកាលពីថ្ងៃទី២៧ខែកក្កដាថា «មានមន្ត្រីគណបក្សប្រជាជនមួយចំនួន ចង់ចូលរួមជាមួយគណបក្សសង្គ្រោះជាតិ»។
ករណីនេះ អ្នកនាំពាក្យគណបក្សប្រជាជនកម្ពុជា បានប្រតិកម្មតាមរយៈសេចក្តីថ្លែងការណ៍ចុះថ្ងៃទី២៧ខែកក្កដា ដោយប្រើពាក្យធ្ងន់ៗតបវិញថា ការនិយាយរបស់លោក សម រង្ស៊ី បំផ្លើសការពិត និងអះអាងថា សមាជិកគណបក្សប្រជាជនគ្រប់លំដាប់ថ្នាក់ ប្រកាន់ភ្ជាប់នូវវិន័យ និងស្មោះត្រង់ លើកថ្នាក់ដឹកនាំរបស់ខ្លួន។
សេចក្តីថ្លែងការណ៍ដដែល រំឭកថា ដើម្បីរក្សាសិទ្ធិកាតព្វកិច្ច និងការទទួលខុសត្រូវរបស់គណបក្សនយោបាយស្របតាមគោលការនីតិរដ្ឋ ក្រោយពេលច្បាប់ស្តីពីវិសោធនកម្មច្បាប់គណបក្សនយោបាយចូលជាធរមាន គណបក្សប្រជាជនថា គណបក្សនយោបាយ ដែលពាក់ព័ន្ធនិងការអត្ថាធិប្បាយរបស់លោក សម រង្ស៊ី នឹងប្រឈមនឹងវិធានការផ្លូវច្បាប់ «គណបក្សនយោបាយ ដែលពាក់ព័ន្ធជាមួយនឹងទណ្ឌិត ត្រូវហ៊ានប្រឈម នឹងផលវិបាកនៃការបណ្តោយឲ្យគណបក្សខ្លួនជាប់ទាក់ទងនឹងទណ្ឌិតខុសនឹងគតិច្បាប់»។
នៅពេលវីអូឌីសួរថា តើក្នុងន័យនេះ គណបក្សប្រជាជនកម្ពុជា ចង់ឲ្យគណបក្សសង្គ្រោះជាតិ ហាមលោក សម រង្ស៊ី ឈប់ឲ្យរិះគន់ភាពអសកម្មរបស់រដ្ឋាភិបាល ឬក៏យ៉ាងណា អ្នកនាំពាក្យគណបក្សប្រជាជន លោក សុខ ឥសាន បញ្ជាក់ដូចនេះ៖ «យើងមិនមានលទ្ធភាពអីហាមទណ្ឌិតមិនឲ្យនិយាយទេ។ ក៏ប៉ុន្តែច្បាប់ស្តីពីវិសោធនកម្មច្បាប់ស្តីពីគណបក្សនយោបាយនេះ បាននិយាយ[ចែង]មិនឲ្យគណបក្សនីមួយៗទៅផ្សាភ្ជាប់ជាមួយទណ្ឌិតទេ។ទណ្ឌិតហ្នឹងនិយាយអីនិយាទៅ កុំឲ្យតែទណ្ឌិតហ្នឹងយកគណបក្សហ្នឹងទៅផ្សាភ្ជាប់ ដើម្បីកេងចំណេញនយោបាយ ពីការឃោសនា របស់ទណ្ឌិតហ្នឹង»។
VOD មិនអាចសុំការអត្ថាធិប្បាយពីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ បាននៅឡើយទេ ដោយលោកមិនលើកទូរស័ព្ទ ខណៈអនុប្រធានបក្សប្រឆាំង លោក អេង ឆៃអ៊ាង ត្រូវបានអ្នកលើកទូរស័ព្ទថា កំពុងជាប់ប្រជុំ។ ទោះជាយ៉ាងណា កាលពីកន្លងទៅ គណបក្សនេះ ធ្លាប់បានបញ្ជាក់ជំហថា នឹងបន្តយុទ្ធសាស្ត្រមិនឆ្លើយ មិនឆ្លង និងមិនឈ្លោះ។
អ្នកស្រាវជ្រាវពីការអភិវឌ្ឍសង្គម និងជាអ្នកតាមដានស្ថានការនយោបាយនៅកម្ពុជា លោក បណ្ឌិត មាស នី លើកឡើងថា ច្បាប់ថ្មីនេះ ពិតជាបានផ្តល់ប្រៀបខ្លាំងដល់បក្សកាន់អំណាច ហើយដាក់សម្តាធដល់គណបក្សផ្សេង ឲ្យលើផ្លូវតូចង្អៀតលើសេរីបញ្ចេញមតិ៖ «បើសិនជាឯកឧត្តម សម រង្ស៊ី ចង់ធ្វើអី [រិះគន់] ឬនិយាយអី ជាមួយគណបក្សប្រជាជន ឯកឧត្តម សម រង្ស៊ី និយាយទៅ ប៉ុន្តែកុំយកឈ្មោះគណបក្សសង្គ្រោះជាតិទៅដាក់ នេះជាសិទ្ធិរបស់គាត់ ក្នុងការនិយាយបាទ នេះជារឿងមួយដែលខ្ញុំគិតថា ជាចំនុចទី១ដែលឯកឧត្តម សម រង្ស៊ី និងគណបក្សសង្គ្រោះជាតិត្រូវតែយកមករៀន ថាតើច្បាប់ហ្នឹង គេនឹងយកមកអនុវត្តយ៉ាងម៉េច នោះ គេធ្វើបែបហ្នឹងយើងឃើញហើយ»។
មាត្រា៦ ថ្មី(ពីរ) នៃច្បាប់គណបក្សនយោបាយ បានចែងថា គណបក្សនយោបាយមិនត្រូវឃុបឃិត ឬប្រើប្រាស់សារជាសំឡេង រូបភាពឯកសារជា លាយលក្ខណ៍អក្សរ ឬសកម្មភាព របស់ទណ្ឌិតជាប់ទោសបទឧក្រិដ្ឋ ឬពីបទមជ្ឈឹម ដើម្បីជាផលប្រយោជន៍នយោបាយខ្លួនឡើយ។
ទោសបញ្ញតិនៃច្បាប់ចែងថា គណបក្សណាបំពានលើច្បាប់នេះ នឹងត្រូវផ្អាកធ្វើសកម្មភាពេយៈពេល៥ឆ្នាំ ឬអាចរំលាយចោល។
យ៉ាងណាក៏ដោយនៅលើហ្វេសប៊ុកផ្លូវការណ៍របស់លោក សម រង្ស៊ី នៅថ្ងៃទី២៨ខែកក្កដានេះ នៅតែបន្តបង្ហោះវីដេអូឃ្លីប ពីប្រវត្តិគណបក្សប្រជាជនកម្ពុជា ដោយថា បក្សកាន់អំណាចមួយនេះ កើតចេញពីបក្សកុម្មុយនីស្តវៀតណាម ដែលលោក សម រង្ស៊ី ដាក់ចំណងជើងថា «ទំព័រប្រវត្តិសាស្ត្រ»៕