អង្គការឃ្លាំមើលសិទ្ធិមនុស្សអន្តរជាតិ(HRW) រិះគន់ខ្សែភាពយន្តស្តីពីស្ថានភាពនៅក្នុងសម័យខ្មែរក្រហមដែលផលិតដោយតារាល្បីរបស់សហរដ្ឋអាមេរិកថា បានយកកម្លាំងយោធពលខេមរភូមិន្ទទៅថតជាមួយដោយលោកចោទថា កម្លាំងប្រដាប់អាវុធទាំងនេះបច្ចុប្បន្នសិ្ថតក្រោមគណបក្សកាន់អំណាចនិងបានរំលោភសិទ្ធិមនុស្សផ្សេងៗ។
ភាពយន្តស្តីពីស្ថានភាពជីវិតនៅក្នុងសម័យខ្មែរក្រហមដែលផលិតដោយតារាល្បីឈ្មោះអាមេរិកលោកស្រី Angelina Jolie មានចំណងជើងថា «ដំបូងគេសម្លាប់ឪពុកខ្ញុំ»។ រឿងនេះលោកស្រី Angelina Jolie គ្រោងនឹងយកទៅដាក់ប្រកួតប្រជែងពានរង្វាន់ Oscar នៅឆ្នាំ២០១៨ ជាពានរង្វាន់សម្រាប់អ្នកមានស្នាដៃផ្នែកសិល្បៈ និងបច្ចេកវិទ្យាក្នុងភាពយន្តរបស់អាមេរិក។
លោក Brad Adams នាយកប្រតិបត្តិអាស៊ីនៃអង្គការឃ្លាំមើលសិទ្ធិមនុស្សអន្តរជាតិ ថ្លែងប្រាប់ទស្សនាវដ្តី New York Magazine កាលពីថ្ងៃព្រហស្សតិ៍ម្សិលមិញថា ការដែលយកទាហានពីកងយោធពលខេមរភូមិន្ទទៅថតជាមួយនោះ ជារឿងមិនត្រូវ ខុសបច្ចេកទេសនៃការផលិត និងមិនមានសីលធម៌វិជ្ជាជីវៈ។ លោកបន្តថា កងទ័ពបច្ចុប្បន្នកំពុងស្ថិតនៅក្រោមឥទ្ធិពលរបស់លោកនាយករដ្ឋមន្ត្រី ហ៊ុន សែន ហើយបានយកប្រើប្រាស់ក្នុងការដាក់គំនាបលើបក្សសង្គ្រោះជាតិជាបក្សប្រឆាំង ការបង្ក្រាបលើកម្មករតវ៉ាដើម្បីតំឡើងប្រាក់ឈ្នួលកាលពីឆ្នាំ២០១៤ និង ការបង្ក្រាបការតវ៉ាផ្សេងៗជាដើម៕