រដ្ឋមន្ត្រីការពារជាតិជប៉ុន​ដែលចូលធ្វើសង្គ្រាមលាលែងពីតំណែង

រដ្ឋមន្ត្រីការពារជាតិជប៉ុនជាស្ត្រី​ដែលគេស្គាល់ថា ជាអ្នកចូលចិត្តធ្វើសង្គ្រាម​នោះ ប្រកាសលាលែងចេញពីតំណែងនៅថ្ងៃសុក្រនេះ ពាក់ព័ន្ធរឿងរ៉ាវឯកសារមួយចំនួននៅក្នុងជួរកងទ័ព ស្របពេលដែលលោក​នាយករដ្ឋមន្ត្រីនៃប្រទេសនេះកំពុងរងការចោទប្រកាន់ពីរឿងអាស្រូវជាបន្តបន្ទាប់។​

នាយករដ្ឋមន្ត្រីលោក ហ្ស៊ីន ហ្សូអាបេ ប្រឈមនឹងការធ្លាក់ចុះប្រជាប្រិយភាពយ៉ាងខ្លាំងដោយសាររឿងអាស្រូវកើតឡើងបន្តបន្ទាប់ ហើយលោក​អាបេក៏តែងសុំទោសដល់សាធារណជនជាញឹកញាប់ដែរ។​ នេះបើតាមទីភ្នាក់ងារព័ត៌មាន AFP។​

លោកស្រី​ តូម៉ូមី អ៊ីណាដា រដ្ឋមន្ត្រីការពារជាតិជប៉ុន បានថ្លែងនៅក្នុងសន្និសីទសារព័ត៌មាននៅព្រឹកថ្ងៃសុក្រនេះថា លោកស្រី បានដាក់លិខិតស្នើលាលែងពីតំណែងនោះទៅនាយករដ្ឋមន្ត្រីហើយ ចំណែកនាយករដ្ឋមន្ត្រីក៏បានទទួលយកសំណើនោះហើយដែរ។​

លោកស្រី អ៊ីណាដា ជាអ្នកដែលគេស្គាល់ថា ជាតិនិយមខ្លាំងក្លានិងមានភាពរឹងមាំ ត្រូវបានលោក​អាបេទុកចិត្តហើយតែងតាំងជារដ្ឋមន្ត្រីការពារជាតិកាលពីឆ្នាំ២០១៦ ហើយគេរំពឹងថា លោកស្រី នឹងក្លាយជាមេដឹកនាំប្រទេសនៅថ្ងៃខាងមុខ។​

ប៉ុន្តែជិតមួយឆ្នាំមកនេះ លោកស្រី អ៊ីណាដា ត្រូវបានគេរាយការណ៍ថា ជួបភាពចម្រូងចម្រាស់ម្តងហើយម្តងទៀត ក្នុងការដោះស្រាយបញ្ហាលើក្រុមការងារសន្តិភាពរបស់ជប៉ុនទៅកាន់ប្រទេសស៊ូដង់ថា ធ្វើឲ្យស្ថានភាពកាន់តែអាក្រក់៕