កូរ៉េខាងជើង បានវាយបកទៅលើក្រុមប្រឹក្សាសន្តិសុខអង្គការសហប្រជាជាតិវិញ ដែលបានថ្កោលទោសចំពោះការបាញ់គ្រាប់មីស៊ីលចេញពីនាវាមុជទឹករបស់ខ្លួន ហើយថែមទាំងគំរាមវាយប្រហារបន្ថែមទៀត។ នេះដោយយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
AFP បានរាយការណ៍ថា ក្រុមប្រឹក្សាដែលមានសមាជិក ១៥ប្រទេសមួយនេះ កាលពីថ្ងៃសុក្រកន្លងមក បានចាត់វិធានការបន្ថែមទៀត ប្រឆាំងនឹងកូរ៉េខាងជើង ប៉ុន្មានថ្ងៃក្រោយពីប្រទេសនេះបានបាញ់គ្រាប់មីស៊ីលចេញពីនាវាមុជទឹក។
នៅក្រោមសេចក្ដីសម្រេចរបស់អង្គការសហប្រជាជាតិ កូរ៉េខាងជើង ត្រូវបានហាមឃាត់មិនឲ្យប្រើប្រាស់បច្ចេកវិទ្យាមីស៊ីលនោះឡើយ ប៉ុន្តែ ប្រទេសនេះបានបំពាន ដោយបានបាញ់គ្រាប់មីស៊ីលជាបន្តបន្ទាប់ ក្រោយការសាកល្បងនុយក្លេអ៊ែរកាលពីខែមករាកន្លងមក។
យោងតាម AFP អ្នកនាំពាក្យក្រសួងការបរទេសកូរ៉េខាងជើង បានចាត់ទុកសេចក្ដីថ្លែងការណ៍របស់អង្គការសហប្រជាជាតិ ជា«ផលិតផលនៃទង្វើជាចោររបស់អាមេរិក» ហើយនិយាយថា ក្រុងវ៉ាស៊ីងតោន មិនអើពើនឹងការព្រមានពីក្រុងព្យុងយ៉ាងនោះឡើយ៕