អ្នករាយការណ៍ពិសេស ស្តីពីសិទ្ធិមនុសុ្សនៅកម្ពុជា បានថ្លែងនៅកាន់ឧត្តមស្នងការសិទ្ធិមនុស្ស នៃអង្គការសហប្រជាជាតិថា ប្រជាធិបតេយ្យរបស់កម្ពុជា នៅពេលនេះ គឺត្រូវការការពារសិទ្ធិមនុស្សដ៏រឹងមាំមួយ ដោយជម្រុញទៅរដ្ឋាភិបាលប្រទេសកម្ពុជា ឲ្យគោរពនូវការសន្យារបស់ខ្លួនឲ្យខ្ជាប់ខ្ជួន។
អ្នករាយការណ៍ពិសេស ស្តីពីសិទ្ធិមនុសុ្សនៅកម្ពុជា លោក ស្រីរ៉ូណា ស្មីត បានបញ្ជាក់ទៅកាន់ឧត្តមស្នងការសិទ្ធិមនុស្សប្រចាំទីក្រុងហ្ស៊ឺណែវ ប្រទេសស្វីស កាលពីថ្ងៃទី២៦ខែកញ្ញាឆ្នាំ២០១៧ ថា កម្ពុជា នៅមិនទាន់បានការពារសិទ្ធិមនុស្សឲ្យបានពេញលេញ តាមគោលការណ៍រដ្ឋធម្មនុញ្ញរបស់ខ្លួននៅឡើយ ដោយថា នៅមានភាពយឺតយ៉ាវ និងខ្វះចន្លោះ។
លើសពីនេះ លោកស្រី មានប្រសាសន៍ថា កម្តៅនយោបាយនៅកម្ពុជា បច្ចុប្បន្ននេះ កំពុងតែរុញច្រានឲ្យកម្ពុជា ធ្លាក់ទៅកាន់ស្ថានភាពមួយ ដែលបញ្ហាសិទ្ធិមនុស្ស កំពុងទទួលរងនូវការគំរាមកំហែងយ៉ាងខ្លាំង ក្រោយពីមានការរុកកួនគណបក្សប្រឆាំង សង្គមស៊ីវិល និងសារព័ត៌មានឯករាជ្យ។
លោកស្រី ថ្លែងប្រាប់មហាសន្និបាតនៅក្រុងហ្ស៊ឺណែវថា៖ «ការធ្វើឲ្យកាន់តែយ៉ាប់នៃចន្លោះប្រជាធិបតេយ្យ និងសេរីភាពនៃការបញ្ចេញមតិក្នុងកម្ពុជា គឺបញ្ហាសំខាន់ ជាមួយអង្គការក្រៅរដ្ឋាភិបាល និងអ្នកការពារសិទ្ធិមនុស្ស គឺជាគោលដៅនៃការគំរាមកំហែង ធ្វើទុកបុកម្នេញ ចាប់ខ្លួន ឬក៏ចាប់ឃុំខ្លួនបណ្តោះអាសន្ន»។
ទោះបីមានការរិះគន់ពីសំណាក់មជ្ឃដ្ឋានអន្តរជាតិ មន្ត្រីរដ្ឋាភិបាលកម្ពុជា នៅតែអះអាងថា កម្ពុជា បានគោរពយ៉ាងខ្ជាប់ខ្ជួន ក្នុងការគោរពសិទ្ធិមនុស្ស និងបានវាយបក ទៅកាន់អ្នករិះគន់ទាំងនោះថា មើលឃើញកម្ពុជា តែមួយជ្រុងប៉ុណ្ណោះ។
ក្នុងឱកាសនៃការថ្លៃងពិភាក្សាទូទៅ នៃមហាសន្និបាតអង្គការសហប្រជាជាតិលើកទី៧២ ធ្វើឡើងនៅឯសហរដ្ឋអាមេរិក រដ្ឋមន្រ្តីក្រសួងការបរទេសកម្ពុជា លោក ប្រាក់ សុខុន បានថ្លែងថា កម្ពុជា បានក្លាយជាផ្ទាំងស៊ីបរបស់ប្រទេសមួយចំនួន ស្ថាប័នមួយចំនួន របស់អង្គការសហប្រជាជាតិ ព្រមទាំងអង្គការមួយចំនួន ដែលធ្វើការលើវិស័យនេះ រួមទាំងអង្គការសហប្រជាជាតិផងដែរ។
លោក បានបញ្ជាក់ចំពោះមហាសន្និបាតថា កម្ពុជាគោរពជាចាំបាច់នូវសិទ្ធិមនុស្ស តែរាល់របាយការណ៍របស់ អ្នករាយការណ៍ពិសេស របស់អង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា បានលើកតែមួយជ្រុង ដើម្បីទំលាក់កំហុសលើកម្ពុជាទៅវិញ។
លោកថា៖ «តើប្រទេសណាមួយ ដែលមានវត្តមាននៅក្នុងមហាសន្និបាទនេះ នឹងមិនចាត់ការអ្វីសោះ ចំពោះតំណាងរាស្ត្របក្សប្រឆាំង ដែលញុះញង់ឲ្យប្រជាជនដកបង្កោលព្រំដែន បញ្ឆះកំហឹងដោយការញុះញង់ រើងអើងពូជសាសន៍ ការបោះពុម្ភនូវសន្ធិសញ្ញាក្លែងក្លាយ និងផែនទីក្លែងក្លាយ ដើម្បីឲ្យប្រជារាស្ត្រទូទៅយល់ច្រលំថា ទឹកដីកម្ពុជាមួយផ្នែកត្រូវបានទន្ទ្រានកាន់កាប់ដោយប្រទេសជិតខាងនោះ? តើប្រទេសណា ដែលអនុញ្ញាតឲ្យមានការបរិហារកេរ្ត៍ និងមួលបង្កាច់?…ផ្ទុយទៅវិញ ភាសាបែបនេះ ដែលត្រូវបានប្រើប្រាស់ជារៀងរាល់ថ្ងៃ ដោយបក្សប្រឆាំងកម្ពុជា បែរជាមិនដែលត្រូវបានគេថ្កោលទោសទៅវិញ ហើយក៏មិនដែល ត្រូវបានលើកឡើងដោយអង្គការក្រៅរដ្ឋាភិបាល និងអ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជាឡើយ »។
ស្ថានភាពសិទ្ធិមនុស្ស នៅកម្ពុជា បានរងការរិះគន់យ៉ាងខ្លាំងពីមជ្ឈដ្ឋានអន្តរជាតិ ជាបន្តបន្ទាប់ ជាពិសេស ក្រោយការបោះឆ្នោតឃុំសង្កាត់ឆ្នាំ២០១៧។ ការរិះគន់នេះ បានធ្វើឡើង បន្ទាប់ពីមានការគំរាមកំហែង ដោយពាក្យសំដីរបស់មន្រ្តីបក្សកាន់អំណាច ការបញ្ចេញសាច់ដុំរបស់កងអង្គរក្សរបស់លោក ហ៊ុន សែន ការគំរាមកំហែងទៅលើបក្សប្រឆាំង រួមទាំង ការចាប់ខ្លួនប្រធានបក្សប្រឆាំង មុខការបោះឆ្នោត ឆ្នាំ២០១៨។ ករណីនេះផងដែរ ក្រុមអ្នកវិភាគ ក៏បានព្រមានថា ស្ថានភាពសិទ្ធិមនុស្ស និងនយោបាយកម្ពុជា កំពុងខិតជិតទៅរកស្ថានភាពគ្រោះថ្នាក់៕