ដីសាលាខណ្ឌដូនពេញជាងពាក់កណ្តាលនឹងត្រូវប្រគល់ឲ្យឯកជន

សាលាខណ្ឌដូនពេញ (ហ្វេសប៊ុក)

ក្រុមហ៊ុន ហ្វុល អហ្វ អាស៊ីស អ៊ិនវេសមិន ឌឺវេឡុបមិន គឺជាក្រុមហ៊ុនចុងក្រោយដែលទទួលបានសិទ្ធិគ្រប់គ្រង និងជាម្ចាស់កម្មសិទ្ធិលើដីរបស់សាលាខណ្ឌដូនពេញក្នុងទំហំ ១ ៤៨៦ម៉ែត្រការ៉េ រីឯផ្ទៃដីទំហំ៦០០ម៉ែត្រការ៉េទៀត ជាកម្មសិទ្ធិរបស់សាលាខណ្ឌដូនពេញ។

មន្ដ្រីសាលាក្រុងបង្ហើបថាក្រុមហ៊ុនវិនិយោគបានស្នើឱ្យសាលាខណ្ឌដូនពេញប្ដូរពីទីតាំងចាស់ទៅទីតាំងថ្មីជាបណ្ដោះអាសន្ន ដើម្បីងាយស្រួលដល់ក្រុមហ៊ុនអាចសាងសង់អាគារថ្មី។

បើតាមកិច្ចព្រមព្រៀងទិញ-លក់ ធ្វើឡើងរវាងសាលារាជធានីភ្នំពេញ និងក្រុមហ៊ុន ហ្វុល អហ្វ អាស៊ីស អ៊ិនវេសមិន ឌឺវេឡុបមិន កាលពីខែមិនា ឆ្នាំ២០១៦ សាលាខណ្ឌដូនពេញនឹងត្រូវរើចេញពីការិយាល័យចាស់ ដែលមានទីតាំងនៅកែងផ្លូវលេខ៦១ និងផ្លូវលេខ៩០ ហើយរុះរើទៅទីតាំងថ្មី នៅអតីតសាលាន័រតុន ស្ថិតនៅកែងផ្លូវលេខ១១៨ និងផ្លូវលេខ១៩ ក្នុងសង្កាត់ផ្សារចាស់ ខណ្ឌដូនពេញ។

លោក ម៉េត មាសភក្ដី អ្នកនាំពាក្យរដ្ឋបាលសាលាក្រុងភ្នំពេញ បានឲ្យវីអូឌីដឹងនៅថ្ងៃច័ន្ទនេះថា ការប្ដូរទីតាំងនេះធ្វើឡើងតែមួយរយៈប៉ុណ្ណោះ ដើម្បីឲ្យក្រុមហ៊ុនវិនិយោគអាចធ្វើប្រតិបត្តិការការដ្ឋាន និងសាងសង់អាគារថ្មី។

លោកថា៖ «ក៏ប៉ុន្ដែ ដើម្បីឲ្យយើងអាចសាងសង់បាន យើងត្រូវតែផ្លាស់ប្ដូរទីតាំងកន្លែងធ្វើការហ្នឹងចេញសិនហើយ ដើម្បីហ៊ុមព័ទ្ធអាហ្នឹងធ្វើជាការដ្ឋានដើម្បសាងសង់។ តែអាគារថ្មី របស់សាលាខណ្ឌគឺនៅទីតាំងនឹងដដែលទេ»។

លោកបន្ថែមថា បើតាមកិច្ចសន្យា សាលាខណ្ឌដូនពេញនឹងត្រូវប្ដូរទីតាំងជាបណ្ដោះអាសន្ន នៅដើមខែធ្នូ ឆ្នាំ២០១៦ ព្រមទាំងអនុញ្ញាតឲ្យក្រុមហ៊ុនធ្វើការរុះរើ និងសង់អគារថ្មីកម្ពស់៦ជាន់ ជូនសាលាខណ្ឌដូនពេញវិញ។ ចំណែកអាគារសាលាខណ្ឌចាស់នឹងត្រូវវាយកម្ទេចចោលទាំងស្រុង។

យ៉ាងណាមិញ លោកថា លោកមិនទាន់អាចបកស្រាយលម្អិតទាក់ទងនឹងតម្លៃនៃការទិញ-លក់ដីសាលាខណ្ឌដូនពេញ និងលក្ខខណ្ឌនៅក្នុងកិច្ចសន្យាឡើយ។ ប៉ុន្ដែលោកថា នឹងព្យាយាមស្វែងរកពត៌មានបន្ថែមពីលោក មាស ចាន់យ៉ាដា នាយករដ្ឋបាលសាលារាជធានីភ្នំពេញ បន្ទាប់ពីលោកប្រជុំចប់៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ