ក្រុមសិទ្ធិមនុស្សអន្តរជាតិមួយទៀត បានអំពាវនាវទៅរដ្ឋាភិបាលកម្ពុជា ឲ្យបញ្ឈប់ការគំរាមកំហែងទៅលើអង្គការសិទ្ធិមនុស្សក្នុងស្រុក បន្ទាប់ពីមេដឹកនាំកម្ពុជា បានបញ្ជាឲ្យបិទមជ្ឈមណ្ឌលសិទ្ធិមនុស្សកម្ពុជា។
លោកនាយករដ្ឋមន្ត្រី ហ៊ុន សែន បានបញ្ជាផ្ទាល់មាត់កាលពីថ្ងៃអាទិត្យកន្លងមកនេះ ទៅក្រសួងមហាផ្ទៃ ឲ្យត្រួតពិនិត្យផ្លូវច្បាប់ ដើម្បីបិទមជ្ឈមណ្ឌលសិទ្ធិមនុស្សកម្ពុជា ដោយចោទថា មជ្ឈមណ្ឌលមួយនេះ ត្រូវបានបង្កើតឡើងដោយជនបរទេស និងមានជាប់ពាក់ព័ន្ធនឹងមេដឹកនាំអតីតបក្សប្រឆាំងដែលកំពុងជាប់ឃុំ។
ក្នុងសេចក្ដីថ្លែងការណ៍កាលពីថ្ងៃម្សិលមិញនេះ វេទិកាអាស៊ីដើម្បីសិទ្ធិមនុស្ស និងការអភិវឌ្ឍ ហៅកាត់ថា វេទិកាអាស៊ី បានថ្កោលទោសចំពោះការបង្ក្រាបទៅលើអង្គការសង្គមស៊ីវិល ដែលធ្វើការជំរុញលទ្ធិប្រជាធិបតេយ្យ និងការគោរពសិទ្ធិមនុស្ស។
អង្គការវេទិកាអាស៊ី ដែលជាបណ្ដុំនៃអង្គការចំនួន ៥៨នៅតាមបណ្ដាប្រទេស ១៩ បានអំពាវនាវទៅរដ្ឋាភិបាលកម្ពុជា ឲ្យបញ្ឈប់ជាបន្ទាន់នូវការស៊ើបអង្កេតណាមួយទៅលើមជ្ឈមណ្ឌលសិទ្ធិមនុស្សកម្ពុជា និងអនុញ្ញាតឲ្យមជ្ឈមណ្ឌលមួយនេះ ធ្វើប្រតិបត្តិការរបស់ខ្លួនដោយគ្មានការរារាំង។
បន្ទាប់ពីមេដឹកនាំកម្ពុជាចេញបញ្ជាបែបនេះ អង្គការឃ្លាំមើលសិទ្ធិមនុស្សអន្តរជាតិ ក៏បានលើកឡើងផងដែរថា លោកនាយករដ្ឋមន្ត្រី ហ៊ុន សែន កំពុងដើរជិតដល់ចំណុចមួយគ្មានផ្លូវត្រឡប់ក្រោយ។
មជ្ឈមណ្ឌលសិទ្ធិមនុស្សកម្ពុជា ត្រូវបានបង្កើតឡើងនៅក្នុងឆ្នាំ២០០២ ដោយលោក កឹម សុខា ដែលក្រោយមកបានលាឈប់ និងទៅបង្កើតគណបក្សសិទ្ធិមនុស្សនៅក្នុងឆ្នាំ២០០៧។ អង្គការសិទ្ធិមនុស្សមួយនេះ បានស្ថិតក្រោមការដឹកនាំរបស់លោក អ៊ូ វីរៈ រហូតឆ្នាំ២០១៤ មុននឹងផ្ទេរទៅក្រោមការដឹកនាំដោយអ្នកស្រី ចក់ សុភាព រហូតមកដល់បច្ចុប្បន្ននេះ។
មជ្ឈមណ្ឌលមួយនេះ បានច្រានចោលការចោទប្រកាន់ពីលោក ហ៊ុន សែន ដោយអះអាងថា ខ្លួនប្រកាន់ខ្ជាប់នូវឯករាជ្យភាពពីបក្សនយោបាយទាំងអស់ ហើយប្ដេជ្ញាលើកកម្ពស់សិទ្ធិមនុស្ស ដោយឈរលើគោលការណ៍ច្បាស់លាស់៕
