មេដឹកនាំបក្សរាជានិយមហ្វ៊ុនស៊ិនប៉ិច សម្ដេចក្រុមព្រះ នរោត្ដម រណឫទ្ធិ បានប្ដេជ្ញាថា ព្រះអង្គនឹងមិនរិះគន់ចំណុចខ្វះខាតរបស់រដ្ឋាភិបាលនៅក្នុងសភានោះទេ បន្ទាប់ពីបក្សរបស់ទ្រង់ទទួលបានអាសនៈសភា ដែលត្រូវបានបែងចែកពីអតីតបក្សប្រឆាំង។
គណបក្សសង្គ្រោះជាតិ ត្រូវបានតុលាការកំពូលសម្រេចរំលាយចោលកាលពីថ្ងៃទី១៦ ខែវិច្ឆិកា ទៅតាមបណ្ដឹងរបស់ក្រសួងមហាផ្ទៃ ហើយអាសនៈសភាចំនួន ៥៥របស់បក្សនេះ ត្រូវបាន គ.ជ.ប. សម្រេចបែងចែកទៅគណបក្សផ្សេងទៀត ក្នុងនោះមានទាំងគណបក្សហ៊្វុនស៊ិនប៉ិច ទទួលបាន ៤១អាសនៈ។
ឆ្លើយនឹងសំនួរអ្នកសារព័ត៌មាននៅមន្ទីររដ្ឋសភា កាលពីម្សិលមិញ ក្រោយសភាប្រកាសសុពលភាពនោះ សម្តេចក្រុមព្រះ នរោតម្ត រណឫទ្ធិ មានបន្ទូលថា ព្រះអង្គនឹងមិនលើកយកបញ្ហាអវិជ្ជមាននានា ដែលកើតឡើងក្នុងសង្គម រួមទាំងការរិះគន់រឿងរឹបអូសយកអាសនៈរបស់បក្សប្រឆាំងនេះ ទៅសួរដេញដោលក្នុងសភានោះទេ។
ព្រះអង្គមានបន្ទូលទៀតថា គណបក្សរាជានិយមរបស់ទ្រង់ នឹងរំឭកទៅតំណាងរាស្ត្រនៅតាមមណ្ឌលនីមួយៗ ដែលទទួលបានអាសនៈពីការរំលាយគណបក្សប្រឆាំងនេះ ឲ្យពង្រឹងសមត្ថភាព ទាក់ទាញប្រជាប្រិយភាព ដើម្បីឈ្នះការបោះឆ្នោតនាពេលខាងមុខតែប៉ុណ្ណោះ។
ព្រះអង្គថ្លែងថា៖ «ខ្ញុំសូមជម្រាបហើយជម្រាបទៀតៗ អ្នកដែលត្រូវលើកបញ្ហា បើសិនជាមានបញ្ហា លើតុលាការកំពូលនៃប្រទេសយើង។ បើតុលាការកំពូលលោកមិនលើកហើយ…។ អម្បាញ់ម៉ិញ យើងខ្ញុំទាំងអស់គ្នាងើប។ ដល់តែងើបទាំងអស់គ្នាជាតំណាងរាស្ត្រពេញសិទ្ធិ ខ្ញុំក៏សប្បាយដែរ។ ក៏ប៉ុន្តែ ក្នុងនាមខ្ញុំជាប្រធាននៃគណបក្សរាជានិយមហ្វ៊ុនស៊ិនប៉ិច ខ្ញុំក៏សុំឲ្យអ្នកទាំងអស់គ្នាខំប្រឹងប្រែងទៀត ណាលោកណា ក្នុងមណ្ឌលរបស់ខ្លួនដើម្បីបានជាប់ឆ្នោត»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង លើកឡើងថា ក្នុងប្រទេសប្រជាធិបតេយ្យ គេត្រូវការគណបក្សនៅក្រៅរដ្ឋាភិបាល ឬហៅថាបក្សប្រឆាំង មានតុល្យាភាពអំណាច ឬមានអ្នកគាំទ្រប្រហាក់ប្រហែលបក្សកាន់អំណាចដែរ ទើបអាចជំរុញប្រសិទ្ធភាពនៃការអភិវឌ្ឍ និងអភិបាលកិច្ចតាមបែបយន្តការប្រជាធិបតេយ្យបាន។
លោក យង់ គិមអេង ថា គណបក្ស ៣ ដែលត្រូវបែងចែកអាសនៈឲ្យនេះ គ្មានសំឡេងគាំទ្រសូម្បីតែ ១អាសនៈនៅឃុំសង្កាត់ លោកថា ដូចនេះ ពួកគេនឹងមិនអាចជំរុញយន្តការប្រជាធិបតេយ្យបានទេ។
លោកថា៖ «យើងយល់ថា ពួកគាត់ហ្នឹង អត់ហ៊ានធ្វើអីដើម្បីរកតម្លាភាពទេ គឺថាធ្វើយ៉ាងម៉េចសម្របសម្រួលឲ្យខ្លួនមានតួនាទី មានបុណ្យសក្តិប៉ុណ្ណឹងទេបាទ។ អញ្ចឹងទេកន្លងនេះហើយ ដែលអាចធ្វើឲ្យបាត់បង់ផលប្រយោជន៍ដល់ប្រជាពលរដ្ឋ»។
សាស្ត្រាចារ្យវិទ្យាសាស្ត្រនយោបាយ លោក សូ ចន្ថា បានលើកឡើងថា គណបក្សទាំងនេះសុទ្ធតែមិនទទួលបានអាសនៈនៅក្នុងការបោះឆ្នោតកន្លងទៅ ដោយលោកថា អាចមកពីពួកគេអសមត្ថភាព ឬកម្មវិធីនយោបាយមិនទាក់ទាញម្ចាស់ឆ្នោត។
លោក សូ ចន្ថា វិភាគថា ចំណុចសូន្យទាំងនៅថ្នាក់ជាតិ និងថ្នាក់ក្រោមជាតិរបស់គណបក្ស ដែលបានកៅអីនៅរដ្ឋសភាតាមរយៈច្បាប់បែងចែកនេះ លោកវិភាគថា ទំនងធ្វើតាមសេណារីយូរៀបចំរបស់ក្រុមណាមួយ មិនមែនធ្វើឡើងដើម្បីជំរុញប្រជាធិបតេយ្យពិតប្រាកដ។
លោកថា៖ «មិនបានចូលរួមជំរុញលទ្ធិប្រជាធិបតេយ្យទេ ក៏ប៉ុន្តែវាហាក់បានចូលរួមធ្វើឲ្យលទ្ធិប្រជាធិបតេយ្យនៅកម្ពុជានេះ មានលក្ខណៈដើរថយក្រោយទៅវិញ ដើរថយក្រោយ ដោយថា នៅក្នុងសង្គមប្រជាធិបតេយ្យដូចជាមិនដែលឃើញមានទេ»។
រដ្ឋាភិបាលកម្ពុជាអះអាងថា បើទោះបីជាគណបក្សសង្គ្រោះជាតិ ត្រូវបានតុលាការកំពូលប្រកាសឲ្យរំលាយក៏ដោយ ប៉ុន្តែ លោកថា រដ្ឋាភិបាលនៅតែប្តេជ្ញាចិត្តដើរលើគន្លងប្រជាធិបតេយ្យសេរីពហុបក្សដដែល។
ទោះជាយ៉ាងណា សហគមន៍អន្តរជាតិយល់ថា កម្ពុជាបានដើរចាកឆ្ងាយពីគន្លងប្រជាធិបតេយ្យទៅហើយ បន្ទាប់ពីរំលាយគណបក្សប្រឆាំងដ៏ធំនៅក្នុងប្រទេសនេះ៕